Хичээлийн шинэ жил эхлэхэд хоёрхон хоног үлдсэн энэ өдрүүдэд их, дээд сургуулиудын оюутнуудын хичээл сонголт эхлээд байгаа билээ.
Тэгвэл их сургуулиудын сургалтын төлбөр өмнөх жилийнхээс нэмэгджээ.
Манай улсад төрийн өмчийн найман их сургууль үйл ажиллагаагаа явуулдаг бөгөөд эдгээр сургууль өнгөрсөн жил сургалтын төлбөрөө нэмэгдүүлсэн сурагтай.
Монгол Улсын их сургуулийн хичээл сонголт энэ өдрүүдэд явагдаж байгаа бөгөөд есдүгээр сарын 1-нд дуусах гэнэ.
Мөн шинээр элсэгчдэд зориулсан чиглүүлэх сургалтууд салбар сургуулиудын байранд явагдаж байгаа аж. Харин МУИС-ийн хичээлийн шинэ жил есдүгээр сарын 2-нд албан ёсоор эхэлнэ.
Сургалтын төлбөр нэмэгдсэн талаар оюутнуудаас нь тодруулахад “Энэ сургалтын төлбөр нэмэгдээгүй амар байна. Өнгөрсөн жил их нэмсэн болохоор энэ жил нэмээгүй юм болов уу. Харин хичээлээ сонгоход үүсдэг асуудал маань хэвээрээ л байна. Оюутны вэб маань хэзээ гацдаггүй болох юм бол доо” хэмээж байсан.
МУИС-ийн сургалтын төлбөр салбар сургуулиасаа хамаараад нэг кредит нь өөр, өөр үнэтэй байдаг байна.
ШУТИС энэ жил сургалтын төлбөрөө 10 хувиар нэмжээ. Нэмсэн шалтгаан нь олон улсын магадлан итгэмжлэл хийлгэсэн, лабораторийн шинэчлэлт болон улсаас тогтмол зардал өгөхөө больсонтой холбоотой аж.
ШУТИС-ийн нэг кредитийн төлбөр хамгийн өндөр мэргэжпийн чиглэл нь инженерийн чиглэлийн мэргэжлүүд гэнэ. Энэ жил сургалтын төлбөр 10 хувиар нэмэгдээд инженерийн чиглэлийн мэргэжлийн нэг кредитийн төлбөр 100,800 төгрөг болсон байна.
ШУТИС-ийн оюутны вэб энэ сарын 22-нд нээгдсэн бөгөөд энэ өдрүүдэд тус сургуулийн оюутнууд хичээл сонголтоо хийж байгаа юм.
МУБИС-ийн оюутнуудаас сургалтын төлбөр нь өмнөх жилийнхээс нэмэгдсэн эсэхийг асуухад сэтгүүлчийн ангийн нэгэн оюутан “Уг нь нэмээгүй гэж бодож байсан юм. Гэтэл манай мэргэжлийн нэг кредит 10 хувиар нэмэгдсэн байна лээ” гэв.
СУИС-ийн сургалтын төлбөр нь зөвхөн I дүгээр дамжааны оюутнуудынх л 10 хувиар нэмэгдэж 7 сая 200 мянган төгрөг болжээ. II-IV дамжааны оюутнуудын сургалтын төлбөр өнгөрсөн жилийнхээс нэмэгдээгүй байгаа аж. 
Тус сургууль нь монголын хамгийн өндөр төлбөртэй төрийн өмчит сургууль юм. Ямар сайндаа л, сошиал хэрэглэгчдийн зүгээс “СУИС аргагүй аргагүй ихэнх төгсөгчид нь намчид болчихдог өндөр байхаас яахав дээ” гэсэн хошигнол хүртэж явахав дээ.
