УИХ-ын гишүүн, Монголын дугуйн холбооны дэд ерөнхийлөгч Ц.Мөнхцэцэгийг манай папараци дуран онцолж байна.
Түүний хувьд багаасаа хөнгөн атлетикийн тамирчин байсан бөгөөд улсын өсвөрийн шигшээ багт ч орж явжээ. Ингэж явахдаа дугуйн спортын тамирчидтай хамт байрлаж, бэлтгэл, сургуулилт хийдэг үеэс хамгийн анх шууд л мэргэжлийн дугуй унаад сурчихсан гэдэг. Энэ тухайгаа тэрбээр “Биднийг бага байхад унадаг дугуй тэр бүр олдохгүй. Унадаг дугуйтай хүүхэд ч ховор байсан. Тэр болгон унадаг дугуй унах боломж олдохгүй явсаар дугуйн соёл хөгжсөн Герман Улсад очсон юм. Германд сурч байхдаа оюутны байраасаа сургууль хүртлээ унадаг дугуйгаар явдаг байлаа. УИХ-ын гишүүн болсноосоо хойш нэг ч удаа ажилдаа дугуйтай ирсэнгүй. Төрийн ордны журамд Төрийн ордон руу спорт, чөлөөт хувцастай хүн нэвтрүүлэхгүй гэж тусгасан байдаг. Өмнө нь ч дулааны цагт ажилдаа дугуйтай ирж, оройдоо буцаад л дугуйтай явдаг байсан юм” гэжээ.
Түүний хувьд гурван хүүхдийн ээж бөгөөд өөрийн гоолиг эрүүл байх нууц нь дугуйтай холбоотой гэнэ лээ. Тиймдээ ч монголчуудаа спортлог болгохыг хүсдэг тухайгаа нэгэн хэвлэлд ярьсан байдаг.
