Сүүлийн үед томуугийн тархалт ихсэж эмнэлэгт хэвтэн эмчлүүлэх иргэдийн тоо нэмэгдэж байна. Ялангуяа бага насны хүүхэд томуугаар өвчилж, хүндэрч байна.Нийслэл хотод гэхэд л хэвтэн эмчлүүлж байгаа хүүхдүүдийн 92,3% нь амьсгалын замын хүнд халдвартай гэх оноштойгоор эмчлүүлж байгаа юм. 
Өнгөрсөн 7 хоногт хоёр хүүхэд томуугийн хүндрэлээр нас барсан гэх харамсалтай мэдээлэл байна. 21 аймаг 9 дүүргийн хэмжээнд томууны тархалт харилцан адилгүй байна. Өрхийн эрүүл мэндийн төв, нэгдсэн эмнэлгүүдийн амбулаториор үйлчлүүлж байгаа нийт хүмүүсийн 9 орчим хувь нь томуу, томуу төст өвчтэй гэж оношлогдож байна. Харин хэвтэн эмчлүүлж байгаа хүмүүсийн 23 хувь нь амьсгалын замын цочмог халдвараар өвчилжээ. Нэгдүгээр сарын 24-ний байдлаар аймаг, дүүргийн нэгдсэн эмнэлгийн хүүхдийн тасагт хэвтэн эмчлүүлэгсдийн 85,7 хувь нь амьсгалын замын цочмог, хүнд халдвартай байна. Энэ нь өмнөх өдрийн тоон мэдээллээс хэт давсан үзүүлэлттэй гарсан байна.
ХӨСҮТ-ийн Томууны үндэсний нэгжийн дарга А.Бурмаа: Өнгөрсөн долоо хоногт Баянзүрх дүүргийн эмнэлэг болон Орхон аймагт амьсгалын замын хүндрэлээр хоёр хүүхэд нас барсан харамсалтай мэдээлэл байна. Хичээл сургууль ирэх долоо хоногийн даваа гарагт эхэлнэ. Улирлын амралтын үеэр томууны дэгдэлт ийм хүнд нөхцөлтэй байгаа учраас ханиадтай хүүхдээ сургуульд нь явуулахгүй байж дархлааг нь дэмжихийг зөвлөлөө. Мөн амны хаалтаа тогтмол зүүж улирлын томуунаас сэргийлэхийг анхаарууллаа.
Б.Мөнхжаргал
