“Хөгжлийн банкнаас санхүүжүүлсэн төсөл, хөтөлбөрийн хэрэгжилт, үр дүн, зээл олголт, эргэн төлөлтийн явцын талаар хянан шалгах үүрэг бүхий түр хороо”-ны Нотлох баримтыг шинжлэн судлах хоёр дахь шатны сонсгол Төрийн ордонд үргэлжилж байна.
Өчигдөр сонсголын эхэнд Эрчим хүчний яам, Барилга, хот байгуулалтын яам, Нийслэлийн Засаг даргын Тамгын газар-Нийслэлийн хөрөнгө оруулалтын газар салбарын эрхлэх асуудлын хүрээн дэх төслүүдийг авч хэлэлцсэн.
Сонсголд Эдийн засгийн хөгжлийн сайдаар ажиллаж байсан Н.Батбаяр гэрчээр оролцсон юм. Сонсголын үеэр Хянан шалгах дэд хорооны дарга Б.Энхбаяр “Таны Эдийн засгийн хөгжлийн сайдаар ажиллаж байхад Чингис бондын 1,5 тэрбум ам.долларын хөрөнгө оруулалт орж ирсэн. Үүнийг улсын төсвийн шинж чанартай маш олон арга хэмжээнд зарцуулаад дууссан. Томоохон төсөл хөтөлбөрүүдийг санхүүжүүлэх, УИХ хаврын чуулганаар батлахаар байсан. Гэвч үүнийг УИХ битгий хэл Засгийн газрын хуралдаанаар орсон эсэх нь эргэлзээтэй, тендерийн хууль үйлчлэхгүйгээр явагдсан. Зарцуулалтыг харахаар бондын зөвлөлийн гишүүдийн тойрог руу явчихсан дүр зураг харагдаж байна” хэмээсэн юм.
Тэгвэл дээрх асуудалтай холбогдуулан УИХ-ын гишүүн асан М.Зоригт “Би ч гэсэн Хөгжлийн банкнаас мөнгө авч байж билээ. Ерөнхий сайд Алтанхуягтай тангараг тасартал муудаж, Фортууныг өрөөндөө 2-3 цагаар цоожлон байж ятгасаар Хэнтий Сүхбаатарын автозамын санхүүжилтийг шийдүүлж билээ. Энэ хоёртой уулзаж уучлалт гуйж, баярлалаа гаа нэг хэлэх юмсан” хэмээн твиттер хуудаснаа бичжээ.
