ХЗДХ-ийн сайд Б.Энхбаярыг Хятадын “Хуашенконстракшн Монгол” ХХК-д давуу байдал олгосон, авлига, хээл хахууль авсан байж болзошгүй үйлдлийг шалгуулах хүсэлтийг өмгөөлөгч Гэрэл-Очир АТГ-т өглөө.
Өмгөөлөгч н.Гэрэл-Очир ярихдаа “Хуульзүйн сайдыг эрх мэдэл, албан тушаалын байдлаа урвуулан ашигласан гэмт хэрэгт холбогдуулж шалгуулах гомдол гаргаж байна. Улс төрд нөлөө бүхий этгээд хоёр хуулийн этгээдийн хоорондын маргаанд шууд оролцож байгаа нь Монгол Улсын хууль тогтоомжийг зөрчиж байна гэж үзэж байна” гэлээ.
Өмгөөлөгчид хэвлэлийнхэнд мэдээлэл өгөхдөө “Гадаадын хөрөнгө оруулалтын эрхзүйн орчныг сайжруулъя, дэмжье гэдэг Засгийн газрын байр суурьтай санал нэг байгаа. Гэхдээ гадаадын хөрөнгө оруулалт нэртэйгээр давуу эрх эдэлж болохгүй. Монгол Улсын иргэн хуулийн этгээдийн нэгэн адилаар Монгол Улсын хууль тогтоомжийг дагаж мөрдөх үүрэгтэй. Хууль зүйн сайдын хувьд харамсмаар, улсын бүртгэлийн албан хаагчдыг хариуцлага тооцох агуулгатай, давуу байдал олгосон албан даалгавар гаргасан нь илтэд Хятад улсын хуулийн этгээдэд давуу байдал олгосон гэж үзэж байна. Иймээс гомдол гаргаж байна” гэв.
