Дэлхий дахиныг хамарсан коронавирус цар тахлын улмаас Боловсролын яамнаас чиглэл гаргаж ЕБС-ийн сурагчдыг долоо хоногийн гурван өдөр, өдөрт 2 цаг 30 минутаар танхимын сургалт хийж, бусад цагт гэрээр теле хичээл үзүүлэх “гэр сургууль” руу шилжилсэн.
Шилдэг гэж үнэлэгдсэн багш нарын телевизээр зааж буй хичээлийг хүүхэд багачууд хэр ойлгож, хүлээн авч байна вэ гэдэг нь хамгийн чухал. Сурагчид болон эцэг эхчүүдэд “гэр сургууль” зарим талаараа таалагдаж байгаа ч заах арга зүй болон хичээлээ хүүхдүүдэд хүргэж буй байдалд “нэг л тааруу” гэсэн дүн өгөх нь ч байна. Монголын өргөн нэвтрүүлгийн 13 сувгаар хүрч буй теле сургалт нэг хичээл нь ангиасаа хамаарч 1520 минутын хугацаанд үргэлжилж буй. Гэвч танхимын сургалт, онлайн хичээл гэдэг ондоо бөгөөд, самбарт хичээл зааж буй багшийн бичлэгийг телевизээр шууд хүлээн авч буй нэгдүгээр хүүхдийн төвлөрөх болон хүлээн авах чадвар өөр байдаг нь эхний долоо хоногт харагдаж байна.
2019-2020 онд буюу өнгөрсөн жил ЕБС-д зургаан настай 40 мянган сурагч нэгдүгээр ангид элсэж байсан бол энэ жил уг тоо нэг дахин өсч 81 мянган зургаан настан шинээр нэгдүгээр ангид элсэн орсон. Тэд цэцэрлэгийн бэлтгэл бүлэгт дөрөвхөн сар суугаад цар тахлын улмаас найман сар шахуу “гэр цэцэрлэг”-ээр хүмүүжсэн хүүхдүүд. Тиймээс хичээлд төвлөрөх, сурах арга барил өмнөх хүүхдүүдээс харьцангуй сул.
Энэ хэвээрээ явсаар анги дэвших шалгалтдаа орвол тааруу дүн авах магадлал өндөр байгаа аж. Учир нь хүүхдүүдэд онлайн хичээлийг танхимын сургалтын арга барилаар зааж байгаа нь хичээлээ ойлгохгүй, төвлөрч чадахгүй байх нөхцөлийг бүрдүүлж байна гэхэд болно.
Дашрамд дуулгахад, багш нарт 2 цаг 30 минутын танхимын сургалт төвөгтэй байгаа аж. Анги даасан багш нарын хувьд нэг ангийг хоёр хувааж 2 цаг 30 минутаар хоёр удаа заах нь ихээхэн ачаалал үүсгэж, ядрааж байгаа талаар дурьдаж онцолж байлаа.
