“Улаадаггүй” сайд асан Ч.Улаан

Нэгэн цагт Сангийн сайд, ХХААХҮ-ийн сайдаар тус тус ажиллаж байсан Ч.Улааныг “Улайдаггүй” хэмээн тодотгодог. Тэрээр эхнэрийнхээ дүү нарыг толгой дараалан төрийн албанд томилж, сайдын эрх мэдлээрээ тэдний хувийн бизнесийг дэмжиж яваа нь хэдэн жилийн өмнө ил болсон. Ялангуяа сүүлийн жилүүдэд энэ үйлдэлдээ бүр улайрч буй. Төрд насаараа зүтгэсэн гэх зүүсгэлтэй тэрээр хүний жишгээр айж, ичихээ нэгэнт мартсан гэдгийг хүрээллийнхэн нь хүртэл хэлдэг.
Түүний хувьд УИХ-д 1996 оноос хойш тасралтгүй зургаан удаа сонгогдож байсан. Өөрөөр хэлбэл, 24 жил Төрийн эрх барьж, парламентад завсаргүй суухдаа Сангийн сайдаар хоёр удаа, Шадар сайд, ХХААХҮ-ийн сайдын албан тушаалыг давхар хашсан супер намтартай нэгэн билээ.
Намтрыг нь харвал Ч.Улаан сайд тэргүүтнүүд улс орноо хөгжил цэцэглэлт рүү хөтөлж, эдийн засгаа тэлэх замаар үсрэнгүй нийгмийг бий болгочихоор хугацааг туулсан. Гэвч бодит байдал дээр олигтой санаачилсан хуульгүй шахам “шалдан” түүхтэй. Тэрбээр парламентад 24 жил суухдаа ердөө 5-7 хууль санаачилсан намтартай. Ч.Улаан сайд төрийн албаны томилгоо, ах дүүгийнхээ бизнесийг дэмжих тал дээрээ илүү санаачилгатай ажилладгаараа алдартай.