Сар шинийн баярыг угтан зохион байгуулж буй нэр бүхий үзэсгэлэн худалдаанууд энд тэнд гарчээ.
Үзэсгэлэнд үндэсний манлай үйлдвэрлэгч, албан ёсны хүнс, барааны дистрибьютер компани, үндэсний хувцас, малгай, бүс, ноос ноолуур, арьс ширэн бүтээгдэхүүн, үнэт эдлэл, гоёл чимэглэл, хүнсний нэмэлт бүтээгдэхүүн, гоо сайхны бараа, цагаан идээ зэрэг жижиг дунд бизнес эрхлэгч иргэдийн олон нэр төрлийн бүтээгдэхүүнийг борлуулж байна.
Гэвч үнэ ханшны хувьд урьд урьд жилүүдийнхээсээ өсчээ. Үүнийгээ худалдаа эрхлэгчид дэлхийн эдийн засгийн өсөлт, гурилын үнийн нэмэгдэлтэй холбон тайлбарлаж байна.
Тухайлбал, хэвийн боовны хувьд гүрмэл, сүлжмэл, зүсмэл, мушгиа зэрэг олон төрөл байх бөгөөд орц найрлагаараа ялгарч, үнийн хувьд харилцан адилгүй байв. Хэвийн боовны дундаж үнэ 4000-6000 төгрөгийн хооронд байгаа бол дээд тал нь 6900 төгрөгөөр худалдаж байна. Гурилын болон бусад материалын үнэ нэмэгдсэнээс энэ жил хэвийн боовны үнэ өнгөрсөн жилийнхээс 500-1500 төгрөгөөр өсжээ.
Цагаан идээгээр зассан тавгийн ааруул хийц, хэлбэр, хэмжээнээсээ хамааран 200-300 мянган төгрөгийн үнэтэй байна.
Үнэ ханшийн хувьд дараах үнийн хооронд хэлбэлзэж байна.
– Сүүн ааруул 30-35 мянга
-Энгийн чихэртэй ааруул 20-23 мянга
-Чихэргүй ааруул 23 мянга
-Ээзгий 15 мянга
-Өрөм 20-25 мянга
-Шар тос 30 мянга
-Хайлмаг 25-35 мянга
-Сарлагийн сүү 4000
-Хорхой ааруул 25-28 мянга
Хэнтий аймгийн Биндэр сумын “Сүүн Биндэр” үйлдвэр цагаан идээгээр зассан тавгийн идээ 245-595 мянган төгрөгийн үнэтэй гурван төрлийн идээний багц байгаа юм.
Хэдийгээр иргэд бид үндэсний үйлдвэрлэгч нараа дэмжихийг чин сэтгэлээсээ хүсдэг ч, наад захын идээ будаа, боов тосны үнэ иргэдийн цалин орлогоос давсан хэмжээтэй байна.
