Олон өрх айлд амьдралаа сайжруулах боломжийг олгож, гэр хорооллын утаанаас холдон шинэхэн байранд амьдрах мөрөөдлийг нь биелүүлж байсан ипотекийн зээл гацаанд орчихлоо.
Учир нь ирэх 2023 онд тус төсөлд төсвөөс санхүүжилт хаанаас гарах нь тодорхойгүй байгаа. Мөн ипотекийн зээлтэй хүмүүсийн 88.4 хувь буюу нийт 57 мянган өрх айлын 170 мянган гаруй иргэнд зээлийн эргэн төлөлтийг хүү хуримтлуулж тооцохгүйгээр хойшлуулсан.
Төрөөс хүүг нь зогсоож, зээлийн төлөлтийн хугацааг нь хойшлуулаад байхад завшааныг ашиглахгүй өнгөрөх хэн байх билээ. Судалгаанаас харахад, зээлээ хойшлуулсан хүмүүсийн 90 гаруй хувь нь цалингийн орлоготой, дундаж орлоготой хүмүүс аж. Гэтэл төрийн харалган бодлогоор халамж шиг болсон төдийгүй дахин ипотекийн зээл олгох эх үүсвэргүй болох аюултай үүд хаалгыг нээсэн гэдгийг учир мэдэх хүмүүс хэлж буй юм.
Мөн ипотикийн зээл авах хүсэлтэй иргэдээс дээрх асуудлаар багагүй гомдол, санал Өргөдлийн байнгын хороонд багагүй иржээ.
Энэ талаар тус хорооны дарга, УИХ-ын гишүүн М.Оюунчимэг Монголбанк болон Сангийн яамны удирдлагуудад саналаа сонсголоо.
Тэрбээр “Арилжааны банкны судалгаанаас харахад ипотикийн зээлд хамрагдах хүсэлтэй иргэдийн тоо буурахгүй байгаа. Дээрээс нь ипотикийн зээлийн эргэн төлөлт хамгийн сайн гэдгийг ч банкныхан хэлдэг. Монголбанкнаас ипотикийн зээлтэй холбоотой асуудлыг Засгийн газарт шилжүүлэхээр болсон нь буруу биш. Аль болох ипотикийн зээлийн санхүүжилтийг 2023 оныхоо эхний улиралд багтааж уях хэрэгтэй. Мөн санхүүжилтийг хаанаас яаж гаргах вэ гэдгээ улсын төсөв хэлэлцэж байгаа энэ үедээ тодорхой болгох хэрэгтэй байна. Өнөөдрийн байдлаас харахад, ипотикийн зээлийг зогсоогоод, санхүүжилтийг 2023 оны төсөвт тусгаагүй байна. Бүх хүмүүсийг гэр хороололдоо амьдар гэсэн бодлого яваад байна уу, үгүй юу? Тог цахилгааны үнийн нэмэгдэлтэй, агаар хөрсний бохирдол ихтэй ийм орчинд амьдарч байгаа иргэдээ бид нар бас бодмоор байна. Уг нь хамгийн сайн эргэн төлөлттэй зээл бол ипотик гэдгийг бүгд мэдэж байгаа шүү дээ. УИХ-аар мөнгөний бодлого хэлэлцэх үед, мөн Эдийн засгийн байнгын хорооны хурлаар ч үүнийг хэлж байсан. Ипотикийн зээлийн эргэн төлөлтийн хугацааг сунгах биш, холбогдох хуульдаа нэмэлт өөрчлөлт оруулаад боломжтой иргэд нь төлөөд явчихвал санхүүжилт нь гараад ирэх боломжтой байгаа. Энэ зээлд иргэд нь хамрагдах хүсэлтэй байхад шууд зогсоож болохгүй” гэв.
Ямартаа ч, ипотекийн зээлийг хүлээсэн хэдэн мянган орон гэргүй иргэд байсаар байтал эрх баригчдын сонгуулийн шоугаар хямд хүүтэй зээлээ төлөхгүй хоёр жил хагас явсан “халамж горилогсод”-ыг өөгшүүлэн зээл төлөлтийг хойшлуулах нь шударга гэж үү? Ингэснээр дахиад л төсөвт хэдэн их наядаар хэмжигдэх ачаа үүснэ. Төсвийн мөнгө гээч татвар төлөгчдийн мөнгө. Гэтэл татвар төлөгчдөөс авдгаа нэмнэ гэх атлаа зөв зүгээр, зах зээлийнхээ жамаар зохицуулагдаж байсан асуудлыг өөртөө авчирч дампууруулын имэгт авчирч байгааг халамжаас хөдөлмөрт бус хөдөлмөрөөс халамжид шилжүүлэх бодлого гэмээр байна.
