Нийслэлийн АН-ын дарга Д.Пүрэвдаваа багагүй бэлтэй, бэнчинтэй эр. Түүнийг папараци дурандаа онцолж байна.
Д.Пүрэвдаваагийн хувьд 2012-2017 онд Баянзүрх дүүргийн Засаг даргаар, 2017 оноос Монгол Улсын Ерөнхийлөгчийн зөвлөхөөр ажилласан юм.
Д.Пүрэвдаваа нь 2017 он буюу Ерөнхийлөгчийн зөвлөх болсон жилээ 39 сая төгрөгийн орлого олж байсан бол дараа жил нь түүний орлого огцом өсөж 96 сая төгрөгт хүрсэн байгаа юм. Харин 2019 онд 54 сая төгрөгийн орлого олжээ. Харин Д.Пүрэвдаваагийн гэр бүлийн гишүүдийн орлого огцом өсөлттэй байна. Тодруулбал, 2017 онд 140 сая төгрөгийн жилийн орлого олж байсан бол 2018 онд 223 сая төгрөг 2019 онд 425 сая төгрөгийн орлого олж байна.
Сүүлийн долоон жил төрийн албанд дарга голдуу алба хашсан түүний хувьд чинээлэг нэгэн гэдгийг илтгэх баримт бол гурван орон сууц, нэг үйлчилгээний газар, гурван авто зогсоол юм. Эдгээр нь 3 тэрбум 754 сая төгрөгөөр үнэлэгдэж байна.
Түүний хувьд 2017 онд 76 сая төгрөгийн хоёр машинтай байсан бол өнөөдөр түүний унадаг машин 251 сая төгрөгөөр үнэлэгдэж байна. Мөн 200 хонь, 23 адуу, 20 үхэртэй. Сүүлийн хоёр жил энэ тоог тогтмол байдлаар ХОМ-тээ мэдүүлсэн байна. Өсөөгүй, үржээгүй, бас хорогдоогүй.
Д.Пүрэвдаваагийн хувьд 220 сая төгрөгийн үнэлгээ бүхий гурван байршилд газар эзэмших эрхтэйгээр, нэг байршилд өмчлэх эрхтэйгээр газар эзэмшдэг. Нийслэлийн Баянзүрх дүүргийн хувьд хамгийн их газрын асуудалтай дүүрэг. Улсаас үнэгүй өгөх газраа ч эзэмшиж чадаагүй олон иргэн бий. Гэтэл Засаг дарга асан Д.Пүрэвдаваа бүр дөрвөн байршилд газартай. Жирийн иргэнд олддоггүй газрыг Засаг дарга ийнхүү тоймгүй ихээр эзэмшиж байгаа нь өнөөдрийн нийгмийн ялгаатай тал. Ялгаа гаргадаг албан тушаалтнуудын бодит төрх энэ.
Д.Пүрэвдаваагийн хөрөнгө орлого үүгээр ч зогсохгүй. Тэрбээр 80 сая төгрөгийн үнэт эдлэлтэй. 2017 онд Ерөнхийлөгчийн зөвлөх болсон жилээ жилийн 39 сая төгрөгийн орлого олсон ч дансандаа 89 төгрөгийг хадгалж байсан бол 2018 онд жилийн орлого нь 96 сая төгрөг хүрэхэд тэр дансандаа 307 сая төгрөгийг хуримтлуулж чадсан нь анхаарал татахгүй байхын аргагүй.
Түүний хувьд Чин-Ачлал ХХК, Сонохон цэцэрлэг БСБ Бусад, ЦЭНАН ХХК-иудыг эзэмшдэг.
