Өнөөдөр “Драгон” төвд үйл ажиллагаа явуулдаг түрээслэгчдийн төлөөлөл “ЗТХ-ийн сайд С.Бямбацогтын гаргасан буруу шийдвэрээс үүдэн нийт 2000 орчим түрээслэгч болон тээвэрчид хүнд байдалд ороод байна. С.Бямбацогт сайд өөрийн давуу байдлаа ашиглан найз Номин ходинг ХХК-ийн захирал Ш.Баярсайханы Номин агуулах руу Драгон төвийг нүүлгэж, жилийн 1 тэрбум орчим төгрөгийн түрээсийн гэрээ хийсэн байна зэргээр шүүмжилж зарим иргэн мэдээлэл хийсэн.
Тэгвэл ЗТХ-ийн сайд С.Бямбацогт энэ үйл явдлын дараа өөрийгөө шалгуулахаар АТГ-т хандсан байна.
С.Бямбацогт: “ХУУЛЬ ЗӨРЧСӨН БОЛ БИ ХАРИУЦЛАГА ХҮЛЭЭЕ, ЗӨРЧӨӨГҮЙ БОЛ ГҮТГЭСЭН НӨХӨД ХАРИУЦЛАГА ХҮЛЭЭХ ЁСТОЙ
Зам Тээврийн Хөгжлийн сайдын хувьд зам тээврийн салбар, тэр дундаа төмөр зам, авто тээвэртэй холбоотой олон жил бугшсан хулгай луйврын асуудалтай тууштай тэмцэж буй минь олон хүний амин хувийн эрх ашиг, ашиг хонжоо олох гэсэн бусармаг үйлдэлд саад тотгор болж, хулгайн мөнгө, эрх мэдлээ алдахгүй гэсэн этгээдүүд зохион байгуулалттайгаар худал мэдээлэл гарган, гүтгэн гүжирдэх явдал хэрээс хэтэрлээ.
Мөнгөний боол болсон увайгүй нөхдийн захиалгаар сэтгүүл зүйн нэр барьсан ичгүүр сонжуургүй хэсэг этгээд намайг Сонгинохайрхан зорчигч үйлчилгээний төвийг албаны эрх мэдэл, давуу байдлаа ашиглан нүүлгэн шилжүүлсэн мэтээр улангасан гүжирдэж буй нь ор үндэслэлгүй болохыг мэдэгдье.
Миний хувьд АТҮТ хуулиар тогтоосон чиг үүргийнхээ хүрээнд бие дааж гаргасан шийдвэрт ямарваа нэг байдлаар хөндлөнгөөс нөлөөлж оролцсон, элдэв гэрээ байгуулсан, хувийн ашиг сонирхолд хөтлөгдсөн зүйл байхгүй тул уг асуудлаар АТГ-т хандаж шалгуулах болсноо мэдэгдэж байна.
Мөн зориуд зохион байгуулалттай, захиалгатай гүтгэлгийн чанартай мэдээлэл тарааж буй этгээдүүдийг хууль хяналтын байгууллагад өгч шалгуулан нэр төрөө сэргээлгэх болно.” гэжээ.
