2024.01.23-2024.01.24-нд шилжих шөнө Дүнжингарав худалдааны төвийн ойролцоо 60 тонн газ тээвэрлэж явсан автомашин дэлбэрч, томоохон хэмжээний осол гарсан. Ослын улмаас гарсан галын хохирлын хэмжээг эцэслэн тогтоогоогүй энэ цаг үед хэргийг ослын хэргийг Мөрдөн байцаах албанд шалгаж байна.
Одоогийн байдлаар хэрэгт холбогдуулан оcoл гаргасан “Дашваанжил” ХХК-ийн жолооч Ч.Ренчиндорж, Nissan Patrol машины жолооч Э.Мөнхнаран нараас мэдүүлэг авч байгаа ажээ.
Бид энэ хэрэгтэй холбоотойгоор газ тээвэрлэж явсан машины жолооч Ч.Ренчиндоржийн өмгөөлөгч Ч.Баднайнямбуугаас цөөн асуултад хариулт авсан юм.
-Газ тээвэрлэж явсан машин яагаад хоёрдугаар эгнээгээр эргэсэн юм бол?
-Монгол улсын замын хөдөлгөөний дүрэмд зааснаар уулзвараар баруун эргэх жолооч тухайн чиглэлийн хамгийн баруун гар талын захад байрлалаа урьдчилан эзэлж уулзвараар эргэх үйлдлийг хийх ёстой байдаг. Гэхдээ тэвээрийн хэрэгслийн онцлогоос буюу уртын хэмжээнээс шалтгаалж өөр эгнээнээс эргэх үйлдлийг хийхийг зөвшөөрдөг. Тухайлбал Монгол улсын замын хөдөлгөөний дүрмийн 10.6 д зааснаар тээврийн хэрэгслийг өврийн хэмжээнээс шалтгаалж дээр дурдсан хамгийн баруун гар талын эгнээнд байрлал эзэлж тус эгнээнээс багтаж эргэх боломжгүй тохиолдолд өөр эгнээнээс эргэх үйлдэл хийхийг зөвшөөрсөн байгаа. Миний үйлчлүүлэгчийн хувьд 24м урт тээврийн хэрэгсэл нэгдүгээр эгнээс багтаж эргэх боломжгүй учраас хоёрдугаар эгнээнээс эргэх үйлдлийг замын хөдөлгөөний дүрэмд зөвшөөрсний дагуу хийснийг буруутгах боломжгүй юм
– Жолоочийн биеийн байдал ямар байгаа вэ?
– Гайгүй дээ. Мөрдөн шалгах ажиллагаа явагдаж байгаа учраас хэргийн талаар дэлгэрэнгүй мэдээлэл өгөх боломжгүй байна.
УЕПГ-аас ослын талаар тодруулахад “Одоогоор ямар нэгэн хүнд цагдан хорих таслан сэргийлэх арга хэмжээ аваагүй байна.
Эрүүгийн хуулийн 27.10 дугаар зүйлийн 4.2 дахь хэсэгт зааснаар хэрэг бүртгэлтийн хэрэг нээн мөрдөн шалгах ажиллагаа явуулж байгаа тул өөр дэлгэрэнгүй мэдээлэл өгөх боломжгүй байна.
Хэргийн газрын үзлэгт 25 прокурор оролцож байна.” гэв
Бидэнд ирсэн мэдээллээр осол гаргасан автомашин Батлан хамгаалах яамны машин юм байна. Осол болох үед албаны машиныг БХЯ-ны албаны дарга Э.Мөнхнаран барьж байжээ.
Бид хэргийн талаар эргэж мэдээлсээр байх болно.
