Мансууруулах бодистой холбоотойгоор удаа дараа ял шийтгүүлсэн Г.Сарангэрэл болон түүний өмгөөлөгч нар нийслэлийн Эрүүгийн хэргийн давж заалдах шатны шүүхэд хандсаныг өчигдөр тус шүүх хэлэлцлээ.
Түүнийг 2021 оны гуравдугаар сард олон улсын шуудан илгээмж ашиглан оруулж ирсэн мансууруулах бодисоо хүлээн аваад явж байхад нь ЦЕГ-ын Хар тамхитай тэмцэх газрын ажилтнуудад гурав дахь удаагаа саатуулсан юм. Тэрбээр өмнөх үйлдэлдээ гурван жил хорих ял шийтгүүлж, хугацаанаас өмнө тэнсэн суллагдаад удалгүй ийнхүү баривчлагдсан. Гэвч шүүхээс түүнийг цагаатгаж, харин мөрдөн шалгах ажиллагаа явуулсан ЦЕГ-ын Хар тамхитай тэмцэх газрын мөрдөгч асан, ахлах дэслэгч Ж.Эрдэнэ-Ундрахыг Тагнуулын ерөнхий газрын Мөрдөн шалгах газарт эрүүгийн хэрэг үүсгэж шалгах болсон.
Ингэхдээ Г.Сарангэрэлийг хамт яллагдагчаар татсан аж. Тэдэнд холбогдох хэргийг Баянзүрх дүүргийн Эрүүгийн хэргийн анхан шатны шүүх энэ оны нэгдүгээр сарын 2-нд хэлэлцээд Г.Сарангэрэлийг төрийн нууц задруулсан, Ж.Эрдэнэ-Ундрахыг уг зүйл заалтаас гадна Гүйцэтгэх ажлын тухай хууль зөрчсөн гэм буруутайд тооцсон. Улмаар Г.Сарангэрэлд хоёр жил зургаан сар хорих ял шийтгэсэн.
Харин Ж.Эрдэнэ-Ундрахын төрийн нууц задруулсан үйлдэлд нь хоёр жил хорих, Гүйцэтгэх ажлын тухай хууль зөрчсөн хэрэгт нь 7.5 сая төгрөгөөр торгох ял шийтгэсэн
талаар бид өмнө нь мэдээлсэн билээ.
Нийслэлийн Эрүүгийн хэргийн давж заалдах шатны шүүх тэдэнд холбогдох хэргийг хоёр шүүгдэгчийн өмгөөлөгч нарыг оролцуулан хэлэлцээд анхан шатны шүүхээс оноосон шийтгэх тогтоолыг хэвээр нь баталлаа.
