Иргэний Зориг Ногоон Намын дарга Батын Батбаатар болон тус намын удирдлагууд, гишүүдийн хамт С.Зориг агсны хөшөөнд цэцэг өргөлөө. Одоогоос 26 жилийн өмнө буюу 1998 оны аравдугаар сарын 2-ны энэ өдөр Төр, нийгмийн нэрт зүтгэлтэн Санжаасүрэнгийн Зориг бусдын гарт харамсалтайгаар амиа алдсан билээ.
Иргэний Зориг Ногоон Намынхан цэцэг өргөх үеэр тус намын дарга, УИХ-ын гишүүн Батын Батбаатар С.Зориг агсны амь насыг хөнөөсөн хэргийн ажлын хэсэг байгуулах хүсэлтийг УИХ-ын чуулган дөнгөж эхлээд байхад гаргаснаа бүрэн эхээр нь уншиж танилцууллаа. Тэрхүү харамсалтай хэргийг илрүүлэх болов уу? гэж ард түмэн 26 жил хүлээжээ.
26 жил итгэл алдраагүй хүлээсэн иргэдийн хүлээлтийг талаар болохгүйн тулд УИХ-ын гишүүн, ИЗНН-ын дарга Б.Батбаатар УИХ-ын дарга Д.Амарбаясгаланд Төр нийгмийн нэрт зүтгэлтэн С.Зориг агсны амь насаа алдсан хэргийн ажлын хэсэг байгуулах хүсэлт илгээсэн нь өнөөдөр биелэлээ олсон гээд тэрхүү хүсэлтээ бүрэн эхээр нь уншиж танилцууллаа. “Монгол Улсын төр, нийгмийн зүтгэлтэн Ардчилсан хувьсгалын удирдагч С.Зориг агсны амь насыг хөнөөсөн гэмт хэрэг одоог хүртэл илрээгүй байна.
Энэхүү хэрэг илрээгүй байгаа нь Монгол Улсын Үндсэн хуулийн нэгдүгээр зүйлийн 2-т заасан “хууль дээдлэх”, “шударга ёсны зарчим” ноцтойгоор зөрчигдөж байгаа төдийгүй иргэд олон нийтийн төрд итгэх итгэлийн сулруулж, нийгмийн шударга ёсны үнэлэмжийг бууруулж, Монгол Улсын сонгож авсан зам болох Ардчилсан Парламентын засаглалтай байх Үндсэн хуулийн үзэл санаа ганхах нөхцөлд хүргэж байна.
Иймд Монгол Улсын Их хурлийн гишүүний хувьд С.Зориг агсны амь насыг хохироосон гэмт хэргийг мөрдөн шалгах ажиллагаа өнөөдрийг хүртэл удааширсан шалтгаан нөхцөл, гэмт хэргийн мөрдөн шалгах ажиллагааны явцад Эрүүгийн хэрэг хянан шийдвэрлэх тухай хуулийн хэрэгжилт хангагдаж байгаа эсэхэд дүгнэлт хийх зорилгоор Улсын Их Хурлын ажлын хэсэг байгуулах санал үүгээр хзргүүлж байна.
Монгол Улсын Их Хурлын тухай хуулийн 13 дугаар зүйлийн 13.2 дахь хэсэгт заасны дагуу шийдвэрлэж өгөхийг хүсье” гэжээ.
Ийнхүү Төр, нийгмийн нэр зүтгэлтэн Санжаасүрэнгийн Зориг агсны амиа алдсан хэргийн жинхэнэ эзнийг олох ажил нэг алхмаар урагшилж тус хэргийг илрүүлэх ажлын хэсэг байгуулагджээ.
