Х.Тайван өөрийн аав болох Монгол Улсын хошууч генерал Батын Хурц-ын тухай сэтгэл хөдөлгөм дурсамж, бахархлаа хуваалцжээ.
Тэрбээр аавыгаа “чимээгүй баатар” хэмээн тодорхойлж, тагнуулын байгууллагад олон жил ажилласан хүний ёс зүй, сахилга бат, үүрэг хариуцлагыг онцолсон байна.
Х.Тайван бичихдээ:
“Миний хувьд аавыгаа ‘тагнуулч’ гэдгийг 18, 19 нас хүрч байж л бүрэн ухамсарласан. Хэзээ ч гэртээ ажлаа ярьдаггүй, цэрэг хувцастай ирж байгаагүй” хэмээн дурджээ.
Мөн тэрбээр аав нь үргэлж тайван, хяналттай байж, гэр бүлийнхэндээ хүртэл ажлынхаа талаар огт дэлгэдэггүй байсан тухай онцолсон байна.
Нэгэн удаа өөрөө Зэвсэгт хүчинд ажилд орсны дараа ааваасаа зөвлөгөө асуухад:
“Ажлаа ойлгохгүй байгаа бол өөр ажил олж хий”гэж хэлсэн нь тухайн үед гомдол төрүүлсэн ч хожим хамгийн том сургамж болж үлджээ.
Түүнчлэн Б.Хурц генерал ажлынхаа хүрээнд олон сорилт, бэрхшээл туулж, бүр хоригдож байсан ч төр засгаа шүүмжилж байгаагүй, өргөсөн тангарагтаа үнэнч байж ирснийг онцлон өгүүлсэн байна.
Х.Тайван:
“Эр цэргийн алба ‘пацаануудын’ ажил биш гэдгийг ааваасаа л сурсан”хэмээн бичиж, эх орныхоо төлөө зүтгэсэн аавдаа гүн хүндэтгэл илэрхийлжээ.
