Нийслэлийн Сүхбаатар дүүрэгт байрлах тансаг зэрэглэлийн орон сууцны хорооллын найман давхраас залуу эмэгтэй унаж нас барсан хэрэг 2022 онд гарч байв. Талийгаач эмэгтэй нь “Баянхотгор” компанийн гүйцэтгэх захирал Б.Мандахбаяртай дотно харилцаатай байсан гэх бөгөөд Б.Мандахбаярыг хүнийг амиа хорлох нөхцөлд байдалд хүргэх гэмт хэрэгт шалгасан. Энэ хэргийг үйлдсэн байж болзошгүй Б.Мандахбаяр нь Э.Амарбат, Ц.Гантулга хуулийн байгууллагынхантай нийлж, хэргийг хэрэгсэхгүй болгож байжээ. Түүнчлэн нэр дурдагдсан өмгөөлөгч П.Одонтунгалаг нь тухайн үед амиа алдсан эмэгтэйн өмгөөлөгчөөр ажиллаж байсан ч хохирогчийн талд бус эсрэг талд ажиллаж байсан нь тогтоогдож, ийнхүү хуульчийн мэргэжлийн үйл ажиллагааг хууль бусаар явуулах гэмт хэрэгт гүйцэтгэгчээр оролцсон аж.
Тиймээс дээрх Ц.Гантулга, П.Энхтогтох, Б.Мандахбаяр, Э.Амарбат, П.Одонтунгалаг, Б.Батсүх, Ш.Батхолбоо нарыг Эрүүгийн хуулийн
22.1_2 Эрх мэдэл, албан тушаалын байдлаа урвуулан ашиглах
17.3_2_2.2 Залилах
22.5_1 Хахууль өгөх
10.4_1 Хүнийг амиа хорлох нөхцөл байдалд хүргэх
22.4_1 Нийтийн албан тушаалтан хахууль авах
22.1_1 Эрх мэдэл, албан тушаалын байдлаа урвуулан ашиглах
21.14_2 Хуульчийн мэргэжлийн үйл ажиллагааг хууль бусаар явуулах гэж заасны дагуу эрүүгийн хэрэгт буруутган шалгасан.
Сүхбаатар дүүргийн ерөнхий прокурор асан Э.Амарбат, Шүүх шинжилгээний үндэсний хүрээлэнгийн дэд захирал асан Ц.Гантулга, өмгөөлөгч П.Одонтунгалаг, “Баян хотгор” ХХК-ийн Б.Мандахбаяр нарт холбогдох авлигын хэргийг шүүх хурал 2026 оны хоёрдугаар сард Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхэд болж гэм буруутай гэж үзсэн. Тодруулбал,
- Э.Амарбатыг эрх мэдэл, албан тушаалын байдлаа урвуулан ашиглах гэмт хэрэг үйлдсэн гэм буруутайд тооцож, нийтийн албанд томилогдох эрхийг 04 жилийн хугацаагаар хасаж, 27.000 нэгжтэй тэнцэх хэмжээний буюу 27.000.000 төгрөгөөр торгох ял
- харин Шүүх шинжилгээний үндэсний хүрээлэнгийн дэд захирал асан Ц.Гантулга эрх мэдэл, албан тушаалын байдлаа урвуулан ашиглах гэмт хэрэгт нийтийн албанд томилогдох эрхийг 04 жилийн хугацаагаар хасаж, 15.000 нэгжтэй тэнцэх хэмжээний буюу 15.000.000 төгрөгөөр торгох ял
- өмгөөлөгч П.Одонтунгалагт Хуульчийн мэргэжлийн үйл ажиллагааг хууль бусаар явуулах гэмт хэрэгт хуульчийн мэргэжлийн үйл ажиллагаа явуулах эрхийг 02 жилийн хугацаагаар хасаж, 10.000 нэгжтэй тэнцэх хэмжээний буюу 10.000.000 төгрөгөөр торгох ял оноосон байдаг.
Нийт 56 хавтас бүхий уг хэргийн давж заалдах шатны шүүх хурал дөнгөж сая Нийслэлийн Эрүүгийн хэргийн давж заалдах шатны шүүхэд боллоо. Шүүхэд өмгөөлөгч, шүүгдэгч П.Одонтунгалаг өмгөөлөгчөөсөө татгазсан бөгөөд шинээр өмгөөлөгч авах хүсэлт гаргасан бөгөөд шүүхээс хүсэлтийг хангалаа.
Ингэснээр Сүхбаатар дүүргийн ерөнхий прокурор асан Э.Амарбат, Шүүх шинжилгээний үндэсний хүрээлэнгийн дэд захирал асан Ц.Гантулга, өмгөөлөгч П.Одонтунгалаг, “Баян хотгор” ХХК-ийн Б.Мандахбаяр нарт холбогдох хэргийг 2026.06.25-ны өдөр хүртэл хойшлуулав.
Уг хэргийн талаар бид эргэж мэдээлэх болно.
