Мисс А.Баярцэцэг Грект гацжээ
“Дэлхийн мисс” тэмцээнд 2016 онд эх орноо төлөөлөн оролцож, шилдэг 11-т үлдэж, томоохон амжилт гаргаж байсан мисс А.Баярцэцэг дэлхийн нийтийг хамарсан цар тахал болох коронавирусын улмаас алс холын Грек улсад гацжээ.
Мисс бүсгүйн хувьд цар тахлын өмнө дэлхийн алдартай спорт брэндийн нэг болох “Adidas” брэндийн сурталчилгаанд БНСУ-ын үндэсний хөлбөмбөгийн шигшээ багийн ахлагч Son Heung Min-тэй хамтран тоглосон байдаг.
А.Баярцэцэг загварын тайзнаа алхахаас гадна жүжиглэх авьяастай нэгэн. Мөн монголынхоо болон гадаадын хэд хэдэн кинонд тоглосон гэдгийг хүмүүс мэдэх биз.
Мисс бүсгүй маркетингийн менежер мэргэжилтэй бөгөөд энэ мэргэжлээрээ ажиллаж байгаагүй ажээ. Тэрбээр багынхаа мөрөөдлөө биелүүлж, Лондонгийн их сургуулийн харъяа Эзэн хааны драмын төв сургууль болох “Royal Central School of Speech & Drama”-д анхны Монгол оюутан болж, суралцаж байгаа билээ.
Дэлгэцийн жүжигчний мэргэжлээр суралцаж буй А.Баярцэцэг хамгийн сүүлд “Ээж хадны домог” уран сайхны зураг авалтад оролцсон байна. Мөн түүний гол дүрд тоглосон “Хөх тавилан” уран сайхны кино 41 дэх удаагийн Флоренцийн “Олон улсын эмэгтэй кино уран бүтээлчдийн наадам”-д албан ёсоор шалгараад байгаа билээ.
Түүний хувьд 2014 онд АНУ-ын “Netflix” компанийн бүтээл Марко Поло кинонд тоглосон бол 2018 онд нээлтээ хийсэн Холливудын алдарт жүжигчин Стивен Сигалын ”Attrition” кинонд ч мөн тоглосон юм. Тэр англи, франц, испани хэлтэй. Олон улсын бизнесийн удирдлагын чиглэлээр мэргэжил эзэмшсэн боловсролтой бүсгүй юм.
