Өнөөдөр буюу хоёрдугаар сарын 9-ний өдөр “Forever MA film”, “F studio” хамтын “ӨВӨЛ” нэртэй уран бүтээл нээлтээ хийж байна. Энэхүү уран сайхны кино LOOKTV, Univision, DDISH-ийн цахим сүлжээгээр албан ёсоор нээгдлээ.
Тус дэлгэцийн уран сайхны драм төрлөөр бүтээгдсэн киноны гол дүрд МУСТА Ц.Алдармаа, МУСТА Ч.Болд, МУСТА Г.Чулуунцэцэг, МУСТА Б.Хүслэн, И.Сод-Эрдэнэ нар хамтран тогложээ.
“Forever MA film” дэлгэцийн хоёр дахь уран бүтээлийг өлгийдөн авахаар санаа шулуудаж Ерөнхий продюсерээр жүжигчин Ц.Алдармаа ажилласан байна. Тэрээр өдгөө хоёр дахь бүрэн хэмжээний уран сайхны киног бүтээгээд байгаа юм. Түүний энэ удаагийн сонгож авч олон нийтэд хүргэхээр шийдсэн санаа нь гэр бүлийн нандин харилцаа, хүүхэд гэр бүлд ямар орон зай эзэлдэгийг хүүхэд олохгүй байгаадаа шаналж буй МУСТА Г.Чулуунцэцэгийн дүрээр товойлгон гаргажээ.
Энэхүү уран бүтээлийн зохиолыг сүүлийн үед хүч түрэн кино урлагийн салбарт гарч ирж буй залуу уран бүтээлч Э.Ган-Очир бичсэн байна. Шинэхэн зохиолыг дэлгэцэнд амилуулсан найруулагчаар Ц.Амартүвшин ажилласан бөгөөд ерөнхий зураглаачаар давхар амжилттай ажилласан аж.
Энэ удаа “Өвөл” киноны арын албанд нийт 50 гаруй залуу уран бүтээлчид сэтгэл зүрхээ нэгтгэн ажилласан гэдгийг кино баг онцлон хэлсэн байна. Харин уран сайхны киноны зангилаа, тайлалыг хэрхэн яаж гаргасанг үзэгчид шимтэн үзэхээр хүлээх л үлдлээ.
