Монгол улсын ардын жүжигчин Лоолийн Жамсранжав 1936 оны 8 сарын 4-нд Ховд аймгийн Мянгад сумын “Их арал” гэдэг газар төрсөн. 1957 онд Урлагийн сургуулийг найруулагч мэргэжлээр төгссөн. 1957 оны 8 сараас 11 сар хүртэл Өвөрхангай аймгийн соёлын ордонд найруулагч, 1957 оноос УДЭТ-т жүжигчин. Ж.Мольер “Скапены дамшиглал” жүжгийн Октав, Ф.Шиллер “Хар санаа, хайр сэтгэл” жүжгийн Фердинанд, У.Шекспир “Отелло” жүжгийн Родриго, Яго, “Лир ван” жүжгийн Францын хаан, “Гамлет” жүжгийн Гамлет, Э.Войныч “Овод” жүжгийн Овод, Б.Лхагвасүрэн “Тамгагүй төр” жүжгийн Арчуг зэрэг гол дүрийг бүтээж, 100 гаруй жүжигт оролцон тоглосон. “Гамлет”, “Овод”, “Чи хэн бэ” жүжгийг радиод зохицуулан бичиж, Монголын Радиогийн алтан фондод үлдээсэн.
Түүний урлагт оруулсан их хувь нэмрийг төр өндрөөр үнэлж 1981 онд Монгол улсын гавъяат жүжигчин, 1996 онд Монгол улсын ардын жүжигчин цолоор шагнажээ.
Ардын жүжигчин Л.Жамсранжав агсны анхны гэргий Ө.Уранчимэг хэмээх хатагтай бий. Олон жил ханилж амьдралын жаргал зовлонг хамт туулахдаа зургаан хүүхэд төрүүлснээс урлагийн хүн болсон нь гавьяат жүжигчин Ж.Оюундарь. Түүний охин Ж.Оюундарь удамшсан авъяасаа ургуулж, үргэлжлүүлж яваа монголын ард түмний хайртай уран бүтээлч билээ. 2004 онд “Саран хөхөө” жүжгийн Сурасадини хатны дүрээр “Шилдэг эмэгтэй гол дүр”-ийн шагнал авч, аав нь шагналыг нь гардуулж өгч байсан түүхтэй.
Цагтаа охид бүсгүйчүүдийг араасаа хуйлруулж явсан Л.Жамсранжав гуай хоёр дахь амьдралаа жүжигчин Б.Нармандахтай холбож байсныг мэдэх хүн олон. Тэгвэл тэдний дундаас гарсан хоёр хүүхэд нь өдгөө том болсон.
Жүжигчин Б.Нармандах Л.Жамсранжав агсанд зориулж дуу уран бүтээл зориулан гаргасан байдаг.
“Л.Жамсранжав бол эхийн хэвлийд яс, цуснаас бүрэлдэн ургасан “алт”. Энэ тунгаамал алтаар Монголын театр Гамлет, Фердинанд, Овод, Яго, Ишхүүг цутгасан. Ийм жүжигчин Монголын театр, урлагт дахин заяах эсэхийг бурхнаас асуу” хэмээн Төрийн шагналт, ардын уран зохиолч Б.Лхагвасүрэн нэгэнтээ хэлсэн бий. Үүрд дурсагдах эрхэмүүдийн нэг яалтчгүй МУАЖ Л.Жамсранжав мөн билээ.
