Сэлбэ гол сэргэлээ гэж нийслэлчүүд баярлаж байсан цаг саяхан.
Одоогоос 10 жилийн өмнө буюу 2011 онд “Сэлбэ голын урсацыг сайжруулах, орчныг тохижуулах” төсөл боловсруулж, Сүхбаатар дүүргийн VII хороонд хамаарах Их тойруугийн гүүрнээс Арслантай гүүр хүртэлх 1.3 километр хэсгийг хоёр тэрбум орчим төгрөгөөр тохижуулж байв.
Гэвч бүтээн байгуулалтын төсөл нь томдож, төсөв нь багадсан гэдэг шалтгаанаар гүйцэтгэгч болох “Норбу” компани ажлаа дутуу хийсэн байдаг. Тус компани бүтэн гурван жилийн хугацаанд Их тойруугийн гүүрнээс “Голден вилл” хотхоны гүүр хүртэлх 350 метр хэсгийг л хагас дутуу тохижуулсан юм.
Ингэхдээ голын эргийг зүлэгжүүлж, даланг чулуун хавтангаар бүрж, чулуун зам, шат хийж, усны доогуурх хөрсийг хуулж шинээр хайрга хийн бетон цутгаж, ус нэвтрүүлдэггүй гялгар уутаар хучсан байдаг. Тухайн үед ширгэх дөхсөн голынхоо багахан хэсгийг ч гэсэн ингэж тохижуулсанд иргэд баярлаж, амралт чөлөөт цагаараа голын эрэг дагуу салхилахад сайхан байгаагаа ярьцгааж байсан юм.
Гэтэл хоёрхон жилийн дараа өнөөх их хөрөнгө зарцуулж тохижуулалт хийсэн хэсгийн чулуу нь ховхорч гол нь лаг, шавар, хогонд дарагдаж, өмхий үнэртэн эргээр нь салхилах битгий хал тайван алхаж өнгөрөх ч аргагүй болсон.
Өнгөрсөн 2019-2020 онуудад дахин 5 тэрбум 600 сая төгрөгөөр засвар үйлчилгээ хийсэн. Дээрх түүх дахин давтагдахгүй хэмээн итгэсэн нийслэлийн иргэд ам сайтай байв. Гэтэл өнөө жил гантиг хавтангууд нь өгөрч муудан, дээрх түүх давтагдаад эхэлжээ.
Үүнд хяналт тавьдаг газар байна уу?
Нэг жилийн өмнө хийсэн ажил нэг өвлийг даахгүй байгаад иргэд олон нийт гутарч байна. …Хариуцсан эзэн холбогдогчид нь энэ асуудлыг анхааралдаа авна уу!!!
https://www.facebook.com/chingun.algaa/videos/3987717494642034/?
