Жүжиг үзэж яваад танилцсан хоёр

Монголын хошин урлагийн түүхэнд “Өнгөт инээд” хамтлаг тод ул мөрөө үлдээсэн гэдэгтэй олон хүн санал нийлэх буй за. Өнөөгийн хошин урлагийн томоохон жүжигчдийг “өөрөөсөө төрүүлсэн” гавьяатай тус хамтлагийн удирдлага болох найруулагч Ц.Хүсэлбаатар, түүний гэргий МУГЖ С.Өлзийхүү нар өдгөө үр хүүхэд, ач нараа тойруулсан шигээ амар жирэм амьдарч буй. Тэглээ гээд тэд урлагаас хөндийрсөнгүй өөрсдийн уран бүтээлээ хийсээр, хоёр хүүхдээ урлагийн хүн болгосон.
Хосуудын хувьд бие биенийхээ хамгийн сайн туслагч, шүүмжлэгч нь гэнэ лээ.
Тэд анх 1989 онд Улсын драмын эрдмийн театрт “Аргагүйн эрхэнд оточ” гэдэг жүжиг үзэж байгаад танилцаж байжээ. Тэр үед С.Өлзийхүү өөрийн сайн найз, жүжигчин Ж.Оюундарьтай хамт, Ц.Хүсэлбаатар найруулагч бас нэг найзтайгаа жүжиг үзэж явсан юм ажээ. Тэгээд л жүжиг тарах үеэр Ц.Хүсэлбаатар С.Өлзийхүүд хандан “Чи чинь манай тэнд байдаг бил үү. Хоёулаа хамт харих уу” гээд л замдаа танилцаж байсан гэдэг. Тэд өмнө нь бие биенээ таньдаг байсан ч юм яриад байдаггүй байсан аж.
Энэ тухайгаа С.Өлзийхүү “Хоёр биеэ олж ханилаад, сайн талд нь уусаж, муу талыг нь залруулж амьдарна гэдэг бол их сайхан. Одоо бид хоёр бараг л нэг хүн шиг болж дээ. Анх танилцахдаа хоёр өөр орчинд өсөж, торнисон хүмүүс байлаа. Ханилж суугаад эхэндээ хайрлаж, дурлалцана. Дараагаар нь үл ойлголцох асуудал гарна. Тэр бүхнийг тэвчиж, нэгнийхээ зан араншинг мэддэг болно Тэгээд л хүүхдүүдтэй болж, зорилго маань ч өөрчлөгдөөд ирдэг. Одоо болтол хамтдаа уран бүтээл хийж байна. Хүслээ маань шинэ зохиол бичих, кино хийхэд би ар талын хариуцаж ажилладаг” хэмээн хэвлэлд ярьжээ.