Морины соёлыг түгээж яваа Л.Цагаандалайн уйлсны учир

МҮОНТ-н Үндэсний спортын сэтгүүлч, Монголын Морин Спорт Уяачдын Холбооны тэргүүлэгч, уяач МУСГЗ Лхаажавийн Цагаандалайг танихгүй хүн ховор.
Эрийн хийморь, Манлайн баясгалан , Морьтоны соёл , Адуучин , Уухай зэрэг олон сайхан нэвтрүүлгийг Монгол түмэндээ бэлтгэн хүргэж, Монгол адуу, үндэсний спорт, түүнийг дагасан их өв соёлыг хойч үедээ уламжлуулан үлдээх, хөгжүүлэх, дэлхийд таниулах үнэтэй үйл хэрэгт олон жилийн туршид бие болоод сэтгэл зүрхээ зориулж яваа тэрээр уг нь түүхч мэргэжилтэй ажээ.
Л.Цагаандалай хүүхэд байхын л адуунд хорхойтой нэгэн явсан гэж байгаа. Анх дунд сургуулийн зургаадугаар ангийн хүү санаандгүй морь уясан нь айрагдаж, өдгөө ч санах тоолонд сайхан дурсамжийг сэдрээж байдаг гэнэ. “Аав, ээж хоёр нэгдлийн малтай. Бага дүү гуравдугаар анги. Аав хэд хоног сум руу эмчилгээ хийлгэхээр явсан юм. Морь уях болчихдог аав ирдэггүй. Тэгж байтал аав замын хүнээр “Хүрэн морио барьчих, шарга морио өөрөө мэднэ биз” гэж хэлүүлж. Бөөн баяр. Манайтай айл Мухарчулуун гэж хурдан морьтой сайн уяач ойрхон байлаа. Хүүхэд юугаа мэдэх вэ өвгөнийг дагаад л уяагаа тааруулна. Хөгшчүүд “Хүүхдүүд азтай юм. Энэ хоёр морь их зөв онгойчихлоо” гээд л ярьж байсан санагдана. Тэгээд сумд хоёр насны морь маань хоёулаа айрагдсан. Аз гэх үү дээ. Морьд ч сайн байсан” хэмээн ярьсан нь бий. Ийнхүү багын л морины хоббитой нэгэн явсан сэтгүүлч “Дэлхийг тамгалсан Чингэсийн монгол”-оороо үзэгчид олондоо бэлэг барихаар завгүй ажиллаж байгаа билээ. Их ажлынхаа хажуугаар мориныхны зохион байгуулсан аливаа арга хэмжээг бас хөтөлнө. Түүнчлэн ямар нэг уралдааны үеэр түүнийг унаач хүүхдүүдтэй “найзалчихсан” явааг нь олонтаа харж болно. Саяхан болсон “Их хурд 6”-гийн хөтлөгчөөр ажилласан тэрээр газар газрын шигшмэл хурдан хүлгүүдийн нуруун дээр салхи татуулан давхих, золбоолог унаач хөвгүүдийг хараад бахархахдаа нулимс унагаад авчээ. Ямартаа л Хархорины дэнжид цугласан наадамчин олонд “хүүхдээ багаас нь морь унуулж сургаарай. Хятад мотоцикль унуулав” хэмээн аминчлан захисан ажээ.