Монголын эдийн засгийн өсөлт бууралт, тогтворжилтыг тодорхойлж байдаг ам.долларын ханш 2.892 төгрөг байгааг Монголбанк зарлажээ.
Яг таван жилийн өмнөх энэ өдөр ам.долларын ханш 1.984.44 төгрөгтэй тэнцэж байжээ. Дөрвөн жилийн дотор 998 төгрөгөөр өссөн байна.
Ердөө жилийн өмнө 2808 төгрөгтэй тэнцэж байсан ам.доллар өнөөдөр гэхэд 84 төгрөгөөр нэмэгджээ. Манайх их ойлгомжтой улс шүү дээ. Өөрсдөө үйлдвэрлэдэггүй. Импортоор амьдардаг. Ам.доллар байтугай юанийн ханшийн өөрчлөлт биднийг хямраадаг. Тэр утгаараа манай улс маш эмзэг эдийн засагтай.
Олон улсад валютын ханш, манай стратегийн импортын бүтээгдэхүүний үнэ, гадагшаа экспортолдог зэс зэргийн үнийн аль нэг нь л савлахад манай эдийн засагт томоохон доргилт ирдэг. Тэр доргилтыг хүн амын 90 гаруй хувь нь мэдэрдэг. Үлдсэн 10 хүрэхгүй хувь нь Монгол байтугай дэлхий хямрахад цочихгүй болчихсон.
Ам.долларын монгол төгрөгтэй тэнцэх харьцааг барих үүргийг Засгийн газар, Монголбанк хүлээдэг.
Бодит байдал дээр ам.долларын ханшийг анхаарч, хайхарч байгаа дарга цэрэг ч алга. Улс төрийн сонгууль болохоор л долларыг ярьдаг. Сонгуулийн дараа дарга нар “ярьдаг” ам.доллараа таг мартдаг. Үүнээс харахад ам.долларын ханш хаа хүртэл нисч, ард түмний ачаа хэр их хүндрэхийг төсөөлөхөд ч бэрх байна.
Эдийн засгийн эмх замбараагүй байдал, Засгийн газар, Монголбанкны зүгээс маш яаралтай дорвитой арга хэмжээ авч ам.долларын ханшийг хазаарлах бодлого хийхгүй бол ам.долларын ханш тэнгэрт гарч, төгрөгийн үнэ цэнэ цагаан цаас болж аюул нүүрлэхэд ойртсон байж мэдэхээр байна.
