Хөгжлийн банкнаас авсан зээлээ төлөөгүй ААН-үүдийн асуудал хэдхэн хоногийн өмнө сошиалд эрчимтэй давалгаалж, улмаар нэр нөлөө бүхий сэтгүүлчид тус асуудлын араас эрчимтэй явж, зээлээ төлөхийг шаардан “Өөрөөр нь төлүүлье” хэлэлцүүлгийг өрнүүлэв.
Үнэндээ, өөрсдийнхөө барьцаагүй өгсөн их хэмжээний зээлийн өрийг барагдуулах ажил нь “Хөгжлийн банк”-ны өөрсдийнх нь асуудал. Ард түмний татварын мөнгийг барьцаа хөрөнгөгүй, танил тал эрх мэдлээ ашиглан зорилтот бус “баячууд”-ад өгчихөөд, асуудал үүсэхээр сэтгүүлчдийг урдаа бамбай болгон ашигладаг “мода”-ыг тус банкныхан дэлгэрүүлж байх жишээний.
Ямбыг нь тэд эдэлж, ялыг нь сэтгүүлчид үүрч буй гэлтэй. Өч төчнөөн “Хөгжлийн банк”-аар овоглосон эдийн засагч, ажилтан албан хаагчид байдаг юм билээ. Тэд чухам юу хийдэг вэ?
Эрх мэдэлтнүүд, танил талууддаа хэдэн арван, хэдэн зуун тэрбумаар нь зээл олгож “авилга” авч, нэр нүүрээ тахалчихаад сэтгүүлчдийг “нохойд барьдаг мод” болгомооргүй байна. Мэргэжлийн тодотголтой хамт олон юм бол өгснөө авч чаддаг байх хэрэгтэй байна.
Барьцаагүй зээлийг цаас мэт цацсан “Хөгжлийн банк”-ныхан өөрсдийгөө өмөөрөхдөө гаргууд. Өдгөө тэд зээлдэгчдийнхээ талаар “шүүх хяналтын байгууллагад шилжүүлээд зээлийг нь төлүүлэх гэхээр хэрэг шийдэхэд хамгийн багадаа 70 сар буюу зургаан жилийн хугацаа зарцуулдаг. Хөгжлийн банк гаднаас татан төвлөрүүлсэн эх үүсвэртээ хүү төлж, нөгөө талдаа актив талын зээлийн хүү зогсох эрсдэлтэй.
Цаг алдах хэрээр ирэх оны төсгөлд төлөх 800 сая ам.долларын бондын төлбөрийг хугацаанд нь төлж барагдуулахгүйд хүрэх эрсдэл байна. Засгийн газрын баталгаатай, гаднаас авсан зээл төлөгдөхгүйд хүрвэл энэ зээлүүд буцаан татагдах учраас аль болох зээлийг төлүүлэхээр бид ажиллаж байна” хэмээн ярьж байх жишээний.
“Хөгжлийн банк”-ныхан улс төрч, эрх мэдэлтэн, баячуудад зээл олгохдоо энгийн иргэдэд олгодог шигээ барьцаа шаардахгүй, зээлээ төлөхгүй бол хууль, эдийн засгийн “дарамт” үзүүлэх “чалх”-гүй чадваргүй банк бололтой.
