Шүүхийн шийдвэр гүйцэтгэх байгууллагад удирдлага зохион байгуулалт, сахилга хариуцлага алдагдсаныг гэрчлэх үйл явдал хэдхэн цагийн өмнө гарлаа.
Хорих анги байгууллагын хараа хяналт, харуул хамгаалалт сул байгаагаас хоригдогч нар оргон зайлж, төсвийн хөрөнгө зарцуулан олон хоног эрэн сурвалжилж байж цагдаагийнхан олж баривчилсан.
Тэгвэл Баянзүрх дүүргийн 21 дүгээр хорооны нутаг, хуучнаар “Тоосгоны хорих” гэж нэрлэж байсан хорих ангийн дэргэд байрладаг Эмэгтэйчүүдийн баривчлах байрны гуравдугаар давхраас хоёр хүн унажээ.
Эх сурвалжуудын мэдээлснээр энэ явдал өнөөдөр (2022.10.09) 19.40 цагийн үед болсон байна. Эмэгтэйчүүдийн баривчлах байрнаас унасан хоёр хүний нэг нь 20 настай Т, нөгөө нь 18 настай Н гэх хоёр хөвгүүн байсан гэнэ.
Эмэгтэйчүүдийн баривчлах байранд энэ хоёр хөвгүүн ямар шалтгаанаар очсон, харуул хамгаалалтын ажилтнууд хэрэг явдал болох үед юу хийж байсан нь тодорхойгүй бөгөөд Баянзүрх дүүргийн Цагдаагийн II хэлтсийнхэн эл асуудлыг тодруулахаар нарийвчлан шалгаж буй аж.
Хөвгүүдийг өдгөө ГССҮТ-д хүргэж эмчилж буй бөгөөд биеийн байдал нь хэвийн, нэг нь Хүүхэд асран хүмүүжүүлэх төвийн байранд амьдрах хаягтай залуу байна гэдгийг эрүүл мэндийн байгууллагаас мэдээлсэн юм.
