Хошин урлагийн энэ цагийн шилдэг төлөөлөгчдийн нэг бол жүжигчин Л.Сөрөлт. Тэрбээр өөрийн төрлөх нутгийн сайхан сэтгэлт залуустайгаа нэгдэн Хөвсгөл аймагтаа “Ид шидийн орон” барихаар сэтгэл шулуудан, ханцуй шамлажээ. 
Энэхүү төслийг хоймор нутагтаа хэрэгжүүлэхийн тулд “Хоймор нэг нутаг” хэмээх хандивын арга хэмжээг эхлүүлсэн байна. Тус арга хэмжээний хүрээнд зохиогдох бүхий л урлаг, спорт, хандивын тоглолтын арга хэмжээг жүжигчин Л.Сөрөлт хөтлөхөөр болсон байна.
Энэ тухайгаа тэрбээр “Хөвсгөлийн залуус маань нутагтаа “Ид шидийн орон” барихаар нэгэнтээ сэтгэл шулуудан ажилцгааж байна.
Ийм гэгээн сэтгэл өвөртөлсөн залуусаа дэмжиж “Хоймор нэг нутаг” хандивын арга хэмжээг би хөтөлнөө.
Далайд дусал нэмэр.
Уригдсан та бүхэн минь заавал очоорой. Мөн Хөвсгөл-Ид шидийн оронд хандив өргөөрэй ард түмэн минь.
Тэд хэдийн барилгын сууриа тавиад эхэлсэн шүү. Харин хэдүүлээ хамтдаа сүндэрлүүлгээе” гэжээ.
