Жүжигчин Н.Онон хошин урлагийн нэр хүндэд халдсан хүн бүрд “өшөөтэй”

Х-Түц хамтлагийн жүжигчин Н.Онон одоогоос хэдэн жилийн өмнө Ерөнхийлөгч асан Х.Баттулгаас Монгол Улсын Гавьяат жүжигчин цолыг хүртснийхээ дараагаар “хуншгүй” загнаж, “цолоо буцаагаад аваарай” гэх зэргээр үг чулуудаж байв. Түүний дараахан одоогийн Ерөнхийлөгч У.Хүрэлсүхэд ихээхэн тал засаж, улс төрийн сонгуулийн ажилд нь хөлс урсган зүтгэж байсныг урлагийнхан ярьдаг.
Үүний дараагаар МҮОНРТ-ийн удирдах зөвлөлийн гишүүн гэх нэр хүндтэй, хариуцлагатай албан тушаалыг мэргэжлийн ажлынхаа хажуугаар эрхлэх болсон билээ.
Гэвч тэрбээр сүүлийн үед өөрийнх нь талаар “үг цухуйлгасан” бүрд “өшөөтэй” байдаг болсон бололтой.
Учир нь ХЗДХ-ын Төрийн нарийн бичгийн дарга П.Сайнзориг “Хошин шогийн хэдэн “хүний эрхийг зөрчигч” алиалагч нар ч бас хувь нэмэр оруулсан даа. Хүн доромжилдогоо урлаг гээд ойлгосон гамшигууд. Хүн доромжилсоны төлөө төрөөс ч элдэв шагнал, гавьяатын тэмдэг зүүж өгдөг өө одоо болимоор юм. Компаниуд зар суртачилгаа, улс төрийн намууд сонгуульд хүн доромжлогч нараар нүүр царай хийж оодруулдагаа болих хэрэгтэй” хэмээн бичжээ.
Үүнд уурссан МҮОРНТ-ын удирдах зөвлөлийн гишүүн, Х-Түц хамтлагийн ахлагч, МУГЖ Н.Онон “За ХЗДХЯамны Төрийн нарийн бичгийн дарга П.Сайнзориг гэх энэ өндөр албан тушаалтан Үндсэн хуулийн хүний эрхийн зүйл заалт зөрчөөд бас л огцрох болзолоо хангаад л эхэлчихлээ дээ” гэжээ.
Тэдний сошиал “дайсагнал”-ыг тунгааж буй иргэд “Жүжигчин Н.Онон хошин урлагийн нэр хүндэд халдсан хүн бүрд “өшөөтэй” болжээ хэмээн дүгнэх аж.