Монголын рок попын загалмайлсан эх гэгддэг Зууны манлай дуучин Б.Сарантуяаг танихгүй мэдэхгүй хүн ховор. Өдгөө 50 насны босго алхсан тэрбээр ихэнх бүсгүйчүүд шиг үнэт эдлэл, чимэг зүүлт сонирхдоггүй гэнэ.
Түүнд өнөөдрийнх нь хэрэгцээг хангахуйц эд зүйл л чухал болохоос биш, гоёлын хайрцганд хэвтэх нүд гялбам эрдэнэс огтхон ч хэрэггүй хэмээн үздэг аж. Хэнэггүй, аль эсвэл эгэлхэн ч гэмээр даруу зантай нэгэн болохоор аргагүй биз. Дуучин бүсгүй урьд нь ” Divas Mongolia-2007″ улаан хивсний ёслолын арга хэмжээнд оролцохдоо таван сая төгрөгийн үнэтэй, алмаазан шигтгээтэй цагаан алтан ээмэг, зүүлтээр гоёсон тухайгаа сонирхуулж байсан удаатай.
Энгийн загвартай хар хослол өмссөн ч түүний хэрэглэсэн үнэт эдлэл олны харцыг эрхгүй татаж байсан болов уу. Энэхүү гоёлыг дуучин бүсгүй тухайн үед томоохон дэлгүүрээс түрээсэлж авсан гэдэг. Тэгэхээр ганц удаа хэрэглэх гоёл зүүсгэл дуучин бүсгүйн хувьд ямархуу хэмжээнд тооцогддог нь тодорхой байгаа биз. Хэдэн жилийн өмнө тэрбээр Арабаас багагүй мөнгөөр цул алтан хүзүүний зүүлт, бугуйвчтай нь хамт худалдаж авснаас хойш ийм гоёл цуглуулаагүй гэх. Харин сүүлийн үед поп хатагтай маань байгалийн чулуу болон “Сваровский” шигтгээтэй чимэглэл сонирхож эхэлсэн гэнэ лээ.
