Жүдо бөхийн насанд хүрэгчдийн ДАШТ-ээс алтан медаль хүртсэн Ц.Цогтбаатар, мөнгөн медаль хүртсэн Э.Ариунболд, хүрэл медаль хүртсэн Л.Энхрийлэн нарыг өнөөдөр Биеийн тамир, спортын улсын хорооноос хүлээн авч, хүндэтгэл үзүүлэн мөнгөн шагнал гардууллаа.
Мөн тэдний энгэрийг Биеийн тамирын тэргүүний ажилтан цол тэмдгээр мялаасан юм.
“Дэлхийн аварга гэдэг бол тамирчин хүний хамгийн дээд амжилт юм. Ийм онцгой амжилт гаргасан тамирчдадаа салбарын дээд шагнал болох Спортын тэргүүний ажилтан цол тэмдгийг олгож байгаа. Уг нь 13-аас дээш жил ажилласан хүмүүс уг шагналыг авдаг” гэдгийг Биеийн тамир, спортын хорооны дарга Д.Жаргалсайхан онцоллоо.
зураг
Гэрэл зургийг MPA агентлагийн онцгой зөвшөөрөлтэйгөөр ашиглав
Мөн Олимп, нийтийн биеийн тамир, спортын сайд Б.Бат-Эрдэнэ “Яг одоо Засгийн газраас өргөн барьсан төсвийг хэлэлцэж байгаа энэ үед олимп, ДАШТ-нд амжилт гаргасан тамирчдад сар бүр олгодог мөнгөн шагналтай холбоотой асар их шүүмжлэл явж байна.
Бид тамирчдын идэвх, урам зориг гаргах гол хөшүүрэг болсон шагнал урамшууллын асуудлыг хамгаалж гарна. Засгийн газраас бид ямар ч байсан хамгаалаад УИХ-д төсөв рүү оруулсан. Гэвч одоо нөхцөл байдал амаргүй байна. Өмнө нь байнгын хорооноос гаргасан тогтоол, шийдвэрийг хэрэгжүүлэх гээд олон асуудал, хүндрэлтэй зүйл байгаа” хэмээн ярилаа.
Үргэлжлүүлэн “Засгийн газраас спорт биеийн тамирын салбарынханд онцгой ач холбогдол өгч байгаа бөгөөд тамирчид амжилт гаргахын зэрэгцээ нийгэмд эерэг хандлага бий болгох гэгээрлийн үйл ажиллагааг манлайл гэдэг том даалгаврыг хүлээж авсан.
Өөрөөр хэлбэл, би ДАШТ-д л амжилт гаргасан, бусад нь хамаагүй гэсэн хандлагаар хандаж болохгүй. Тиймээс өөрсдийнхөөрөө үлгэрлэл, манлайлал үзүүлэх нь чухал” гэж хэлээд тамирчдад амжилт хүслээ.
