С.Дулам гуайн ханьдаа бичсэн шүлэг

Шинжлэх ухааны гавьяат зүтгэлтэн, хэл бичгийн шинжлэх ухааны доктор профессор С.Дуламыг монголд танихгүй мэдэхгүй хүн цөөн. Эрдэм боловсролын төлөө энэ биеэ зориулж яваа түүнийг Монгол домог зүй, бөө мөргөл, бэлгэдэл зүйн судалгааг эх орондоо шинээр үүсгэн хөгжүүлсэн хүн гэж гадаад, дотоодод хүлээн зөвшөөрдөг.
МУИС хэмээх эрдмийн их өргөөнөөс мянга, мянган шавь нараа төрүүлэн гаргаж “Дулам багш” хэмээх эрдмийг алдрыг хүртсэн тэрбээр амьдралынхаа дараачийн нэг он тооллыг эхлүүлж “Монголынхоо газар нутагт байгаа хадны зураг, баатарлаг туульс, домгийг соёл урлагийн контент болгон хүргэхээр зорьж байна” хэмээн ярьж сууна.
Тэгвэл тэрбээр өдгөө ханийнхаа төрсөн өдөрт зориулж дараах шүлгийг цахим хуудаснаа тэрлэжээ.
Тэрбээр “Насны ганц ханьдаа энэ хорвоод ээж аавдаа болон наддаа ирсэн өлзийт өдрийн мэнд дэвшүүлье!
ЭНД МИНИЙ СЭТГЭЛ БУЙ
Хайрт хань Нандинбилигтээ
Тивийг хомносон эзэн дээдсийн
Тэнгэрийг холбосон угсаа байдаг
Олхунуд, Боржигидийн алтан хэлхээнд
Оосорт нь ороолдсон миний бие байдаг
Нэрс алагласан хангайн охин
Нэр нь хүртэл Нандин байдаг
Сүйжин тунгалаг булгийн ундарга шиг
Сүж сэтгэлт амраг минь байдаг
Ойн цоорхойд үзэгдсэн буга нь
Охиноо харамласан лус байдаг
Оочин цоочин оддын зураанд
Олж ханилсан зураг минь байдаг
Өлзийтэй гэрийн өрмөг хойморт
Өлгийтэй нар шиг үр минь байдаг
Удах тусам уяран хайлдаг
Учрал ерөөл уяхан байдаг
Найман амтат мөнхийн рашаан шиг
Нандин эрдэнийн хань минь байдаг
Наран сарны солбицол дундуур
Насны зөрүүгийн хайр гэж байдаг аа!
Шивэрт, 2012.08.03” гэжээ.