Зохиолч Б.Шүүдэрцэцэг өчигдөр Монгол Улсын Соёлын гавьяат зүтгэлтэн цолныхоо мялаалга найрыг хийжээ. Түүний мялаалга найранд монголын олны танил хүмүүс цуглаж, ерөөлөө өргөж, бэлэг сэлтгээр эрхэм зохиолчийг “булсан” байна.
Зохиолч Шүүдэрцэцэгийг жинхэнэ нэрийг Б.Тогтохсүрэн гэдэг. Уг нэрнээсээ илүү уран бүтээлийн нэрээрээ танигдсан тэрбээр бүтээлдээ орчин үеийн монгол хүний дүр төрх, залуучуудын хүсэл мөрөөдлийг хөнддөг байсан бол сүүлийн үеийн бүтээлүүддээ Монголын түүхэн хатдын сэдвээр илүү бичих болсон.
Мөн энэ оны эхээр “Хотулун гүнж” тулаант уран сайхны кино төслөө амжилттай хэрэгжүүлэн нээлтээ хийгээд байгаа. Туульсын зохиолын төрлөөр олон арван бүтээл туурвиж, “Домогт Ану хатан”, “Хотол цагаан гүнж”, “Уулсын домог Хотулун” тэргүүтэй томоохон хэмжээний зохиолуудаараа Монголын түүхнээ тодорсон баатарлаг, хүчирхэг монгол хатдын дүрийг товойлгон гаргаж, өнөөгийн охид, эмэгтэйчүүдэд урам зориг, үлгэр жишээ авахуйц даацтай бүтээлүүдийг туурвиж байгаа, эмэгтэйчүүдийн эрхийг хамгаалах, эмэгтэйчүүд, хүүхдийн хүчирхийллийг эсэргүүцсэн сэдвээр олон нийтийн анхаарлыг татсан нийтлэлүүд бичиж, нийгмийн оюун санааны амьдрал, ард түмнийг соён гэгээрүүлэх үйлсэд оруулж буй жинтэй хувь нэмрийг нь үнэлэн түүнд гавьяат зүтгэлтэн цол олгосон билээ.
