Цаст Алтайн нэгэн хүн уул нурж. Монголын уран зохиолд томоохон гарз учирлаа. Д.Нацагдоржийн болон МЗЭ-ийн шагналт яруу найрагч Ламжавын Мягмарсүрэнг хүмүүс Мягаа ах, Шар Мийгаа гэж хайрлан дуудна.
Хаа явсан газраа эерэг энерги түгээж явдаг энэ эрхэм саяхан “Болор цом-40” наадамд шүлгээ дуудаж зогссон.
Хорвоод хэн ч мөнх бус гэдгийг батлах гэсэн шиг эрхэм хүмүүн бурхны орныг зорьжээ.
Тэртээ 1980-аад оны үед манай яруу найрагт “Гал” хэмээх нэгэн бүлгэм мэндэлсэн гэдэг бөгөөд тэд зөвхөн урлаг, уран зохиол, гоо зүйн үзэл санаагаараа нэгдсэн залуус байсны нэг нь яруу найрагч Ламжавын Мягмарсүрэн буюу. Яруу найрагч Дагвадоржийн Цогт, Очирбатын Дашбалбар, Данзангийн Нямсүрэн, соёлын гавьяат зүтгэлтэн Жүмпэрэлийн Саруулбуян, Үржингийн Хүрэлбаатар, Шагдарсүрэнгийн Гүрбазар, төрийн сүлдний зураач Ойдов, доктор Ядамбатын Баатар, яруу найрагч Оюунцэцэг нартайгаа нэгдэж энэ олон жилүүдэд бие биенийхээ урам зориг, ухааны ташуур болж явлаа.
“Болор чулуунд туссан сарны гэрэл”, “Намрын хонгор салхи” зэрэг олон шүлгүүд, монгол хүн бүрийн мэдэх МУГЖ Б.Дашдондогийн дуулж амьдруулсан “Охин” дуу нь монголын ард түмний зүрх сэтгэлд мөнхөд үлдлээ.
Гэр бүл, үр хүүхэд, найз нөхөд, ойр дотны хүмүүст нь эмгэнэл илэрхийлье.
