Баасан гарагийн УИХ-ын чуулган эхэллээ. Өнөөдрийн хуралдаанаар УИХ-ын гишүүн Б.Баттөмөрөөс Монгол Улсын Ерөнхий сайдад хандаж “Дархан арьс ширний цогцолборын үйл ажиллагааны талаар” тавьсан асуулгын хариуг сонсохоор хуваарьт тавигдсан.
Энэ үеэр УИХ-ын гишүүн Н.Алтанхуяг “Хэдүүлээ ард түмнээс сонгогдсон УИХ-ын гишүүд байна даа. Жаахан сэрж, сэдэж жаахан юм хийхгүй юм. Гадаа үнийн өсөлт, ахуй амьжиргааны доройтлоос болоод иргэд бухимдан жагсаж байна. Бид дүлий дүмбэ царайлаад малын арьс шир яриад байж байх юм уу. Ярих ёстой л доо. Гэхдээ өнөөдөр ярих асуудал мөн үү. Ер нь УИХ-ын дайчин, давшингуй, шуурхай байдал дутагдаад байна. Арьс ширний асуудлаа түр хойшлуулчих. Өнөөдрийн УИХ-ын хурлыг арай өөрөөр явуулмаар байна.
Хэдүүлээ нойрноосоо сэрээд, жаахан ажил хийе л дээ. Би нүүрсний хулгайн ажлын хэсэгт оръё гэсэн. Цөөнхийн нэг гишүүн яагаад орж ажиллаж болдоггүй юм. Та нар их сонин хууль баталчхаж. Ажлын хэсэгт УИХ-ын гишүүн орох эсэхийг кнопоор шийднэ гээд намайг унагаачих юм, болиоч дээ. Би та нараас гуйж байна. Хүсэж байна. Баялагтаа эзэн болцгооё гэж хэдэн жил ярив. Одоо баялгийг чинь хулгайлаад дууслаа. Нүүрс хулгайлагдаад дуусаж байна. Одоо зэс бас хулгайлагдаж байгаа. Зэстэй холбоотой хулгайг зогсооё гээд тогтоолын төсөл оруулчихсан явж байгаа.
Нүүрсний хулгайтай тэмцэх нь үнэн бол дэмжмээр байна. Зэсийн хулгайтай тэмцэнэ гэвэл бас дэмжмээр байна” гэв.
