Улаанбаатар хотын авто зам мөсөн гулгуурын талбай болж хувирснаар автомашинууд шүргэлцэх зөрчил нэмэгдсэн бол явган зорчигчдын хөлтэй нь гулгаж, хөл муутай нь мөлхөх нь холгүйгээр ногоон гэрлээр гарч, ажил гэртээ очдог болов.
Нийслэлийн захирагчийн ажлын албанаас өгч буй тайлбараар Улаанбаатар хотод нэг, хоёрдугаар сард цас их хэмжээгээр ордог тул давс, бодисыг байгаагийнх нь зоргоор авто замд цацвал цаг агаар хүндрэхэд нөөцөө шавхах эрсдэлтэй. Иймд өдөрт 5-10 тонноос илүү гаргалгүй хэрэглэх нормд орсон юм байна. Гэвч хэт нарийлснаас цацсан давс, бодис нь халтиргаа гулгааг арилгаж чадахгүй байгаа тул хэмжээг нь нэмэгдүүлэхээс аргагүй болжээ.
Гэвч өнөөх 5-10 тн давс нь хаагуур цацагдаад байгаа нь тодорхойгүй. Бараг л хотын бүхий л газраар “мөсөн гулгуур” мэт нөхцөл байдалтай байгаа.
Халтиргаа гулгаа арилгах байгалийн давс худалдан авах тендерийг өнгөрөгч 11-р сард зарлаж, энэ сарын эхээр буюу 12-р сарын 5-нд компаниа шалгаруулсан сурагтай. Тендерийн нийт төсөв 400 сая төгрөг. Гэтэл өнөөдөр нөгөө тендерт ялалт байгуулсан компани, аж ахуйн нэгж ч сураггүй, төсвөөс гарсан гэх 398.8 сая төгрөг нь “алга болжээ”.
Угтаа, дүүрэг дүүргийн ТҮК-үүд өөр өөрсөддөө цас хайлуулах бодис, байгалийн давсыг авдаг. Тэдэнд нийслэлийн төсвөөс мөнгө гаргаж дахин давс, бодисыг нийлүүлдэг. Гэтэл өдгөө ТҮК-т давс нийлүүлэх ёстой том, жижиг тендерүүд бүгдээрээ ор сураггүй болжээ.
Нийслэл нь мөнгөө өгчихсөн хэрнээ Улаанбаатар хот чинь давсны нөөцгүй байна. Эндээс харахад, давсны мөнгөө дундаа хийгээд идчихсэн гэхээр хардлага төрүүлж байна.
Ямартаа ч, хальтаргаа гулгаагаа арилгаж чадахгүй юм бол төсвөөс гаргасан 400 сая төгрөгөө гаргаад ир ээ, Хотын дарга аа
