“Нүүрсний” гэх хэргүүдийг шалгах тагнуул, цагдаа, авлигатай тэмцэх байгууллагын ажлын хэсгийнхний саналыг үндэслэн НПГ-аас Ерөнхийлөгч асан Х.Баттулгын ойрын хүмүүст таслан сэргийлэх арга хэмжээ авхуулах санал шүүхэд хүргүүлжээ.
Тодруулбал, Зам, тээврийн сайд асан, Үндэсний аюулгүй байдлын зөвлөлийн нарийн бичгийн дарга асан А.Гансүх, Зам, тээврийн яамны Төрийн нарийн бичгийн дарга, “Монголын төмөр зам” ТӨХК-ийн гүйцэтгэх захирал зэрэг албан тушаал хашиж байсан Б.Батзаяа нарыг уг хэрэгт холбогдуулан шалгаж буй аж. АТГ-ын ажлын хэсгийнхэн нүүрсний олборлолт, экспорт, тээвэрлэлт, худалдан авах үйл ажиллагаатай холбоотойгоор нээсэн хэрэгт тэднийг шалгах үндэслэл бүхий баримтад тулгуурлан мөрдөн шалгах ажиллагааг тасралтгүй явуулахын тулд хилээр гарахыг нь хязгаарлах таслан сэргийлэх арга хэмжээ авхуулахаар болсон юм байна. НПГ-аас Сүхбаатар дүүргийн Эрүүгийн хэргийн анхан шатны шүүхэд хүргүүлсэн саналыг шүүх хүлээн авч Монгол Улсын хилээр гадагш гарахгүй байх таслан сэргийлэх арга хэмжээ авсан гэнэ. Баттай эх сурвалжуудаас авсан мэдээллээр тэдний өмнө нь шалгуулж байсан, Гашуунсухайт чиглэлийн 280 км төмөр замын барилгын ажилтай холбоотой үйлдлийг “нүүрсний” гэх хэрэгтэй холбогдуулан сэргээн шалгаж эхэлсэн тул ийнхүү таслан сэргийлэх арга хэмжээ авчээ.
Түүнчлэн ЭЦА-наас “нүүрсний” гэх хэрэгт холбогдуулан “Ажнай корпорац” компанийн хөрөнгө оруулалттай “Тавантолгой транс” ХХК-ийн захирал, Монголын морин спорт, уяачдын холбооны дэд ерөнхийлөгч, тод манлай уяач Д.Дагвадорж нарыг Хан-Уул дүүргийн Эрүүгийн хэргийн анхан шатны шүүхийн шүүгчийн захирамжаар 30 хоног цагдан хорихоор болоод байсан. Тэднийг орон нутгийн өмчит “Тавантолгой” ХК-иас их хэмжээний нүүрс авч, 2013-2017 оны хооронд Өмнөговь аймаг дахь Гашуунсухайт боомтоор “хоосон” гэсэн бүрдүүлэлтээр хилээр гарган БНХАУ-д экспортолж татвараас зайлсхийсэн хэрэгт буруутгасан билээ. Тэгвэл өнгөрсөн долоо хоногт Д.Дагвадорж нарыг сулласан байна. Учир нь Д.Дагвадоржийн өмгөөлөгч А.Ундрах, Б.Тэнгис, “МБМ транс” ХХК-ийн гүйцэтгэх захирал Г.Мөнхдөлийн өмгөөлөгч Р.Мэндсайхан, “Зун Мен” ХХК-ийн гүйцэтгэх захирал Ши Шаохуа гэх эмэгтэйн өмгөөлөгч Х.Мөнгөнсүх нар энэ сарын 16-нд гаргасан шүүгчийн захирамжид гомдол гаргасныг өдрийн шүүгчийн захирамжид гаргасан гомдлыг өнгөрсөн баасан гарагт Хан-Уул дүүргийн Эрүүгийн хэргийн анхан шатны шүүхийн ерөнхий шүүгч хянан хэлэлцээд хэрэгт цугларсан баримтуудаар “Тавантолгой” ХК-иас нүүрс хулгайлсан байж болзошгүй гэх хэрэг Өмнөговь аймгийн нутагт үйлдэгдсэн. Эрүүгийн хэрэг хянан шийдвэрлэх тухай хуулийн 2.3-3 дахь хэсэгт “Хэрэг бүртгэлт, мөрдөн байцаалт явуулах хэд хэдэн байгууллагын эрх хэмжээнд харьяалагдах гэмт хэрэгт хэрэг бүртгэлт, мөрдөн байцаалт явуулах харьяаллыг прокурор тогтооно” гэж заасны дагуу тус хэрэгт мөрдөн байцаалт явуулах харьяаллыг тогтоосон прокурорын шийдвэр байхгүй. ЭЦА-ны Эдийн засгийн гэмт хэрэгтэй тэмцэх хэлтэс мөрдөн байцаалт явуулж буй бөгөөд тухайн албан нь Чингэлтэй дүүргийн нутаг дэвсгэрт оршдог. Өөрөөр хэлбэл, НПГ-аас яллагдагч нарт цагдан хорих таслан сэргийлэх арга хэмжээ авхуулахаар ирүүлсэн саналыг мөрдөн байцаалт явуулах харьяалал тогтоосон прокурорын шийдвэрийг хэрэгт хавсаргаагүйгээс Хан-Уул дүүргийн Эрүүгийн хэргийн анхан шатны шүүхээр шийдвэрлэх үндэслэлгүй гэж дүгнэн яллагдагч нарыг цагдан хорьсон захирамжийг хүчингүй болгожээ.
