Гэр бүлийн сэтгэлзүйн доктор Г.Наранбаатар энд явна

Гэр бүл зүйч гэхээсээ илүү сэтгэлзүйч гэдгээрээ олонд танигдсан Г.Наранбаатарыг энэ удаад бид онцолж байна.
Түүний хувьд хүүхэд байхаасаа сэтгэлзүйч мэргэжилд дуртай байжээ. Тэрбээр Америкт арав гаруй жил амьдарсан ба 2000 оноос Америкт сурч янз бүрийн ажил хийдэг байжээ. Тухайлбал, цэвэрлэгч, угаагч, сушины тогооч, машин буулгагч гэх мэт маш олон төрлийн хөдөлмөрийг эрхэлж байв. Энэ тухайгаа тэрбээр дурсахдаа “Эргээд бодохоор өнөөдрийн Наранбаатарыг бий болгосон учраас тэр үедээ би талархдаг юм. Учир нь ажиллаж сургалтын төлбөрөө олоод сургуульдаа явдаг байсан нь хичээлдээ шамдах нэг шалтгаан болсон” хэмээн ярьжээ.
Түүний амьдралд тохиосон нэгэн том боломж нь Холливудын алдарт найруулагч Кен Уиллстэй танилцаж түүний тусламжтайгаар докторт суралцах болсон явдал юм. Түүний сургалтын төлбөрийг төлснийхөө хариуд мэргэжлээрээ Монголдоо ажиллах болзлыг тавьсан байна. Улмаар Г.Наранбаатар 2012 онд доктор хамгаалснаас хойш Монголд суурин ажиллаж байгаа юм. Тэрбээр Сэтгэлзүйчээр бакалавр, бизнесийн удирдлагаар мастер, гэр бүлийн сэтгэл засалчаар докторын зэрэг хамгаалжээ.