“UVERTURA” хамтлагийн гишүүн А.Шинэбаяр дуурийн ДУУЧИН бүсгүйг гэргийгээрээ сонгосон. Түүний гэргийг Э.Адъяасүрэн гэдэг бөгөөд Цагдаагийн “Сүлд” чуулгад дуулж яваа бие хаа, царай зүс тэгш нэгэн. 
Дуучин Э.Адъяасүрэн цахим хуудаснаа “Би байнга боддог юм…. Хэнд ч хариуцлага үүрүүлдэггүйн гай ийм хэмжээнд хүртэл даамжирсан гэж… Хэн дуртай нь хулгай хийж болдог, хэн дуртай нь улсаа зарж болдог, хэн дуртай нь худлаа попорч улс төрд гарч ард иргэдийн бүх боломжийг дээрэмдэж болдог, эргээд хэн ч хариуцлага үүрдэггүй, хэн ч араас нь хянаж шалгаж явдаггүй, хэдэн өдөр шуураад л хулгайч нарынхаа толгойг илээд, үнсээд л мартдаг. Нэгэнт ийм хэв маягаар сүүлийн хэдэн жил улс орон маань уруудан мөхөж байгааг бүгд мэдэж байгаа. Харин одоо гарц шийдлийг олох нэн чухал. Яаж вэ ? – Ард түмний буюу залуучуудын парламент байгуулах. Энэ нь төрд гарсан хүмүүсийн ажил үүргийн биелэлтийг хянаж шалгаж, шаардлага тавих, шаардлагатай үед хариуцлага үүрүүлэх эрх мэдэлтэй байх. Үүнд хууль хүчний байгууллага хамтарч ажиллах бүрэн эрхийг олгох. Энэ парламент дотроо задраад хэд хэдэн хэсэгт хариуцлага шаардлага тавих мэргэжлийн хүмүүсээр баг бүрдүүлэх. Жишээ нь хүнсний аюулгүй байдалд яг мэргэжлийн мэдлэгтэй хүмүүс нь, эрүүл мэндийн салбар, за тэгээд уул уурхай юу байдын улс оронд маань хөндөгдөж байгаа бүхий л салбарт…. – Дур зоргоороо улс эх орны газар шороо, үнэт баялагийг эрх мэдлээ урвуулан ашиглаж захиран зарцуулсан, авилгад хамтарсан хүн нэг бүрийг олж эхнээс нь хариуцлага үүрүүлэх – Иргэн бүр амьдарч буй хороо дүүргийнхээ сонгогдсон гишүүдийг хянаж шалгаж шаардлага тавих гэх мэт хариуцлагатай л хандах хэрэгтэй санагддаг. Би дур мэдэж ярьж байж магадгүй , үнэхээр залуучуудын парламент байгуулаад шижигнэсэн боловсролтой, мэдлэгтэй, туршлагатай хүмүүсийн бүрдэл болж чадвал дорхноо учраа олоод хөл толгой нь мэдэгдэх болов уу гэж боддог юм. Аргаа барсан иргэн хүний л бодол шүү. Битгий тэгээд эрсдэл тоочоод шүүмжлээд байгаарай. Ер нь болохгүй юм гэж байхгүй. Би улс төр сонирхохгүй ч улс төр намайг оролдоно гэдэг л болж байна. Гарц шийдэл ер нь юу байна, хуваалцаач” гэв.
