Япон судлаач Д.Төмөрбаатар: Эцсийн эцэст, биднээс өөрсдөөс их юм шалтгаална шүү
Аман дээрээ бол монголчууд шүүмжилж, уурлаж, шаардаж, хашгичаж, янз бүрийн бичлэг хийж, “алалцъя үзэлцье” гэцгээдэг
Ачир дээрээ буюу аливааг хийх, бүтээх туурвих, ухаалгаар мэтгэлцэх болохоор аргалдаг, зугтаадаг болсон байна. Асуудалтай шууд тулж, өөрчлөх дэвжих, өөрөөр сэтгэх чадваргүй болж. Ажлаас зугтаадаг, бодож сэтгэхээс, учрыг нь олохоос залхуурдаг, хэлээд бичээд тайлбарлаад өгөхөөр уншдаггүй, ойлгодоггүй, ойлгох гэж хичээдэггүй болжээ. Хийх гэж зүтгэдэггүй, учрыг нь олох гэж сэтгэдэггүй учраас бэлдсэн өгөөш шидэхэд үмхээд авахад бэлэн “сүрэг” болжээ.
Ардчилал, хөгжил, дэлхийн чиг хандлага, хиймэл оюун гэх мэт агуу том сэдэв ярьсан гялгар үстэй залуус хүүхнүүд дэлгэцээр гарч, хачин чамин лайвууд, бөгс бөөрөө гаргасан нөхдийн ичмээр царай төрхийг цахимаар үздэг болов. Ард түмэн “мунхагших” тусам “нөгөөдүүлд” амар болж, харин, тэр хэрээр “учрыг нь олж, мөн чанарыг нь хэлж өгөх” хүмүүс ил гарах нь багасна.
Тийм үйл явц ч харагдаж байна.
Би, бид яагаад ийм болоод байна, гэж, дор бүрнээ бодохгүй бол “диваажин сүндэрлүүлнэ” гээд байгаа хүмүүс сонгуулийн дараа бахь байдгаар чинь л байлгана шүү! Эцсийн эцэст, биднээс өөрсдөөс их юм шалтгаална шүү!!!
