Монгол түмний сонсох дуртай дууг уран бүтээлчид өөрийнхөөрөө хэрхэн амилуулсанг бид ХАРЬЦУУЛАЛТ булангаараа хүргэдэг билээ.
Энэ удаад бид 1993 онд бүтээгдсэн “Зүрхний санаашрал” дуугаар бэлтгэж байна. Уг дууны үгийг н.Буд, хөгжмийг нь Ч.Амаржаргал зохиосон бөгөөд МУГЖ С.Хүрэлбаатар анх дуулж олны хүртээл болгосон юм. Аяыг нь зохиосон МУГЖ Ч.Амаржаргал ч түүнд л зохино хэмээн уг бүтээлийг дуулуулсан түүхтэй. Уг гайхалтай хит бүтээлээ МУГЖ С.Хүрэлбаатар дахин шинэчлэн дуулж, дүрсжүүлсэн юм.
Тэгвэл энэхүү дууг нийтийн дууны ертөнцөд “хэл ам, хэрүүл тэмцлээрээ” дуулиан тарьж, олны анхааралд өртсөн дуучин Т.Баярхишиг дуулсан байна. Түүний хувьд хэд хэдэн дууг ийнхүү шинэчлэн дуулсан дуучин. Тэрбээр уг бүтээлийг мөн л зохиогчийн зөвшөөрөлгүй дуулсан гэж зэмлүүлсэн түүхтэй.
Тэднээс гадна уг гайхалтай бүтээлийг жүжигчин Б.Даваажав мөн дуулж, цахим орчинд байршуулсан юм.
Бид энэхүү булангаараа Монголчуудыг талцуулах бус, гайхалтай бүтээлийг хэн нь өөрийнхөөрөө хэрхэн амилуулсанг нэг дор сонсох боломжийг олгодог. Нөгөө талаас энэ нь урлагийн мэдлэг олгох танин мэдэхүйн ач холбогдолтой булан юм.
Бэлтгэсэн А.Баярмаа
