Монголын дууны ертөнцөд тэргүүлэх байр суурь эзлэдэг дууны сэдэв бол “ээж”. Дууны яруу найрагч, хөгжмийн зохиолч, дуучин хэн бүр өөрийн ээждээ зориулан дуун суварга бүтээхийг зорьдог нь нууц биш юм. Ээжийн олон сайхан дуу уран бүтээлүүдээс бид энэ удаа “Баярлалаа ээжээ” дууг онцлож байна.
“Баярлалаа ээжээ” дуу болохоос өмнө яруу найрагч, Төрийн шагналт Ш.Гүрбазар өөрийн дуу хоолойгоор шүлгээ уншиж, түүнийг нь “Brand media group” клипжүүлэн түмэн олноо хүргэсэн. Ингэж “Баярлалаа ээжээ” шүлэг дуу болох замналдаа орсон гэхэд хилсдэхгүй биз ээ.
Ш.Гүрбазар “Баярлалаа ээжээ” шүлэг
Төрийн шагналт, яруу найрагч Ш.Гүрбазарын “Баярлалаа ээжээ” шүлэгт хөгжмийн зохиолч Д.Амгалан буюу Амка аялгуу хийж дуучин П.Баттүвшин, Ж.Үржинханд дуулан олонд хүргэсэн. Мөн л “Brand media group” продюсерлон гаргажээ. Өдгөөгөөс 6 жилийн өмнө нийтийн дууны ертөнцөд нэгэн сайхан уран бүтээл нэмэгдсэн нь энэ юм.
Дуучин П.Баттүвшин, Ж.Үржинханд “Баярлалаа ээжээ”
“Баярлалаа ээжээ” дууг хоёр жилийн өмнө МУАЖ С.Батсүх, МУГЖ С.Эрдэнэцэцэг, Бяцхан сод авъяастан Б.Бат-Энэрэл дуулсан нь бас нэгэн шинэлэг хувилбар байв.
МУАЖ С.Батсүх, МУГЖ С.Эрдэнэцэцэг, Бяцхан сод авъяастан Б.Бат-Энэрэл “Баярлалаа ээжээ”
Сайн дуу шинээр дахин дуулагдаж, үеийн үед эгшиглэх хувьтай байдаг. Энэ л жамаар яваа гэлтэй “Баярлалаа ээжээ” дуу цоо шинэ дуучидаар амилан олны хүртээлт хүрэв. Нийтийн дууны ертөнцөд хүч төрөн орж ирж буй “Хоёр загал” хэмээн түмэн олноо хүндлэгдэн буй залуу дуучин бол Д.Даваадалай, Ө.Бохьшарга нар юм. Тэд “Баярлалаа ээжээ” дууг өөрсдийн 21 аймгийг тойрох аялан тоглолтондоо зориулж дуучин Г.Энхцэцэгтэй хамтран шинэчилсэн найруулгатайгаар хүргэсэн нь уг дууг дахин нэгэн шинэ хувилбараар түмэн олны сонорт хүргэжээ. Тэд зохиогчдоос албан ёсны зөвшөөрлийг авч шинэчлэн дуулсан ба хөгжмийн найруулгыг “Аянга” студийн захирал, ая зохиогч Э.Эрболд бүтээжээ.
Д.Даваадалай, Ө.Бохьшарга, Г.Энхцэцэг “Баярлалаа ээжээ”
Дэлхийн бүх хэлэнд ЭЭЖ гэдэг үг хамгийн эрхэм үг байдаг. Ээжийн тухай бодол, ээжтэй холбоотой үг бүхэн хиргүй тунгалаг, гэгээлэг байдаг болов уу … Хамгаас хайртай ээждээ зориулан дуулах “Баярлалаа ээжээ” дууг ямар уран бүтээлч сайн амилуулсанг мэргэн уншигч та бүхэн дор бүрнээ тунгаах биз ээ.
Б.Мөнхжаргал
