Уламжлалт Монгол шатрын олон улсын анхдугаар тэмцээн Монгол улсын нийслэл Улаанбаатар хотноо өнөөдөр (2024.09.08) эхэлж байна.
Энэ удаагийн тэмцээнд Монгол улсын тамирчдаас гадна ОХУ-ын Буриад, Халимаг, ӨМӨЗО-ы тамирчид оролцож байгаа юм. Тэмцээнийг Дэлхийн монголчуудын уламжлалт шатрын нэгдсэн холбоо зохион байгуулж байгаа бөгөөд хамтран зохион байгуулагчаар Соёл, спорт, аялал жуулчлал, залуучуудын яам, Биеийн тамир спортын улсын хороо, ӨМӨЗО-ы Монгол шатрын холбоо ажиллаж байгаа.
Монгол шатар нь Монголын түүх уламжлал, нүүдлийн ахуй соёл, зан заншил шингэсэн байдгаараа онцлогтой.
Олон улсын энэхүү тэмцээний талаар Дэлхийн монголчуудын уламжлалт шатрын нэгдсэн холбооны тэргүүн Г.БААТАР: Дэлхий нийтээрээ даяаршиж байгаа энэ цаг үед Монголчууд босоо бичиг, үндэсний дээл хувцас, уртын дуу, түүх өв соёлоороо гайхагддаг ард түмэн. Монгол ахуйг шингээж, түүх өв соёлыг Монгол шатар өөртөө шингээсэн байдгаараа онцлогтой. Европын орнуудад зөвхөн эрчүүд, язгууртан ихэс дээдэс л шатар тоглодог байсан. Харин Монголд баян ядуу, эр эм, хүүхэд хөгшидгүй тоглосоор ирсэн түүхтэй. Өнөөдрийн тэмцээнд нь найман настай балчраас наян настай ахмад тамирчин оролцож байна. Цаашид бид Монгол шатрыг сурталчилах зорилгоор жил бүр тэмцээнийг зохион байгуулна.” Гэв.
Дэлхийн монголчуудын уламжлалт шатрын нэгдсэн холбоо 2020 онд байгуулагдсан. Цар тахлын үед үйл ажиллагаагаа түр завсарласан ч өнөөдөр Буриад, Халимаг, Өвөрмонгол зэрэг элэг нэгт ахан дүүсээ уриад уламжлалт Монгол шатрын олон улсын тэмцээнийг анх удаа эх орондоо зохион байгуулж байгаа нь энэ юм.
Өнөөдөр дэлхийн хэмжээнд Өвөрмонголчууд уламжлалт Монгол шатрын спортыг түгэн дэлгэрүүлж, амжилттай түүх өв соёлыг түүчээлсээр байгааг Дэлхийн монголчуудын уламжлалт шатрын нэгдсэн холбооны тэргүүн Г.Баатар онцлон тэмдэглэсэн.
Нүүдлийн аж ахуйтай дэлхийн цөөхөн ард түмний нэг нь Монголчууд билээ. Монголчуудын түүх, өв соёлыг шингээсэн дүрслэлтэйгээрээ Монгол шатрын онцлог бөгөөд хойч үедээ өвлүүлэх нь эрхэм үүрэг гэдгийг тэмцээнд оролцогчид хэлсэн юм.
Цаашид Монгол шатрыг ЮНЕСКО-ийн соёлын өвд бүртгүүлж, эрдэм шинжилгээний хурлыг Дэлхийн монголчуудын уламжлалт шатрын нэгдсэн холбооноос зохион байгуулах аж.
Тамирчид тэмцээнээ хүндлэн Монгол хувцсаа өмсөж оролцож байгаа нь бахархалтай байлаа.
Ингээд өнөөдрийн тэмцээний нээлтээс бэлтгэсэн фото сурвалжилгыг хүргэж байна.
Бэлтгэсэн: Б.Жаргалмаа, А.Баярмаа
