Манай сайтад Сэлэнгэ аймгийн Баруунбүрэн сумын иргэд хандаж мэдээлэл өглөө. Тэдний мэдээлж байгаагаар Сэлэнгэ аймгийн Баруунбүрэн сумын засаг дарга Ц.Сэлэнгэ гэгч самарчидтай уулзаж, дарамталж байгаад самрыг нь зах зээлийн үнээс хямд авдаг байна.
Тэрбээр энэ үйлдлээ сүүлийн гурван жилийн турш хийж байгаа гэх мэдээлэл байна.
Тодруулбал,
2022 онд 70 шуудай самрыг сургууль болон ЗДТГ-ын ажилчид уулнаас авч ирж ЗДТГ-ын гаражид хураасан байна. Улмаар уг ажилд оролцсон хоёр хүний дунд нэг шуудай самар өгчээ. Уг самрыг тээвэрлэж оруулж ирсэн хүн нь “хөрөө рамын Баяраа” гэдэг хүн бөгөөд тэрбээр хоёр удаа тээвэр хийсэн гэх мэдээллийг өглөө. Сумын ЗДТГ-ын гаражид байсан уг самар хэд хоногийн дараа сураггүй алга болсон бөгөөд тухайн үед хүмүүсийн яриагаар Ж.Отгонбаяр гэх хүн рапс доор нууц ачиж явсан гэх яриа бий.
Үүний дараа жил буюу 2023 онд цагдаа нарын хураан авсан ДӨРВӨН ТОНН самар хаачсан нь мэдэгдэхгүй мөн л ор сураггүй алга болсон байгаа юм. Тодруулбал, хураан авсан самрыг аймгийн цагдаа дээр байсныг аймгийн Байгаль орчин газраар дамжуулан суманд хүлээлгэн өгсөн аж. Үүнийг нь сумын ЗДТГ-т нярав ченжүүдэд худалджээ. Уг нь хураасан самарыг сумын засаг даргын орлогч өмч худалдан борлуулах комисс дуудлага худалдаа явуулж борлуулах ёстой боловч хуулийн дагуу ажиллаагүйг эх сурвалжууд батлан хэлж байв.
Энэ жилийн хувьд хууль журмаараа бол 10-р сараас самар түүх ёстой байтал самарчид нь наймдугаар сараас ууланд гарсан байна. Байгаль хамгаалагч нь ажиллах гэхээр бензинээр хангаж өгдөггүй аж. Өөрөөр хэлбэл сумын засаг дарга нь хууль бусаар самар түүж байгаа иргэдийг мэдсэн ч мэдээгүй юм шиг царайлж, уулнаас бууж ирэхтэй нь зэрэгцэн дарамталж асар бага үнээр худалдаж аваад дамлахыг санаархаж байгаа аж.
Уг нь энэ төрлийн хэрэгт Экологийн цагдаа анхаарал хандуулан ажиллах ёстой ч сум орон нутаг хүн ам багатай тул н.Сэлэнгийн дарамтад орсон экологийн цагдаагийн алба хаагчид юу ч хийж чаддаггүй гэдгийг эх сурвалж хэллээ.
Бид энэ талаар эх сурвалжуудаас тодруулан эргэж мэдээлсээр байх болно.
А.Баярмаа
