Улсын Хүүхэд, Залуучуудын театрын даргаар МУГЖ Н.Ариунболд өнгөрсөн жилээс ажиллаж байгаа билээ. Хошин шогийн угшилтай тэрбээр уг театрт хошин шогийн жүжигчид “чихсэн” бөгөөд уран бүтээлүүдэд нь өнөөх л хошин шогийн жүжигчид нь тоглож байгаа харагдана лээ.
Тэдний дийлэнх нь Н.Ариунболдын Шинэ үе хамтлагт ажиллаж байсан хүмүүс болохоор үзэгчдэд жүжиг гэхээсээ илүү хошин шог үзэж байгаа мэт мэдрэмж төрчих гээд байгаа биз ээ…
Нөгөө талаас анхны бүтээл болох “Хайрыг Хайрла” жүжиг тайзнаа тоглогдов. Жүжгийн гол дүрд 40 гарсан Д.Оюунтуул өөрөөсөө үе мултарсан дүү залуухан жүжигчинтэй хайр дурлалд умбаж байгаа залуус хосын дүрийг бүтээсэн юм. 
Гэвч тэрбээр дүрдээ хөгшдөөд байгааг нь илт анзаарагдсан. Ур чадвар нь байвч олноо хошин шогийн жүжигчин гэдгээрээ танил болсон болохоор “жаахан охин”-ы дүр түүнд даанч зохимжгүй байсныг үзэгчид ч ярьж байлаа. 
Хүүхэд, залуучуудын театр тул академик шаардлага тавих нь илүүц биз. Нөгөө талаас шинэ хамт олон нэг цул болж ажиллахад цаг хугацаа шаардлагатай, анхны уран бүтээл гэх зөвтгөл бас энд яригдах болно. Одоо тэгээд үзэгчид нь тэдэнд дасах ёстой л болж байх шиг…
