Erennews.mn сайтын сэтгүүлч Р.Саруултөгс, МСНЭ-ийн Ерөнхийлөгч Ө.Отгонбаатар нар энэ сарын 03-нд мэдээлэл хийж, сэтгүүлзүйн хараат бус байдалд халдаж, ажил үүргээ гүйцэтгэсэн сэтгүүлчийг гүтгэж, нэр төр алдар хүндийг нь гутаах үйлдлийг удаа дараа гаргасан эрх мэдэлтнийг хуулийн байгууллагад шалгуулна гэдгээ мэдэгдэж байсан. Тэгвэл өчигдөр сэтгүүлч Р.Саруул УИХ-ын гишүүн, Хууль зүйн сайд асан Б.Энхбаяртай холбоотой, Хятадын хөрөнгө оруулалттай компанид давуу байдал олгосон баримтыг АТГ-т хүлээлгэн өгч, шалгуулахаар болсон юм. Тэрбээр энэ талаараа УИХ-ын гишүүн Б.Энхбаяр нь ХЗДХ-ийн сайдаар ажиллаж байхдаа хоёр компанийн өмч хөрөнгийн маргааныг хуулийн дагуу биш сайдын “Албан даалгавар” нэртэй хувийн үзэмж шингэсэн албан бичгээр шийдвэрлэж, Монгол Улсад урд өмнө байгаагүй жишиг тогтоосон аж.
Б.Энхбаярыг ХЗДХ-ийн сайдаар томилогдож байхад Монгол Улсад бүртгэлтэй “Аюуд” болон БНХАУ-ын хөрөнгө оруулалттай “Хуашенконстракшн Монгол” гэсэн хоёр компанийн дунд өмчийн маргаан үүсэж, талууд гомдлоо бүх шатны төрийн байгууллага, хуулийн байгууллага, яам тамгын газарт илгээж байжээ.
Б.Энхбаяр энэхүү мэдэгдэлдээ “Аюуд” тауэрын төсөл “Хуашенконстракшн Монгол” компанийн хөрөнгө оруулалтаар боссон. Гэтэл монголчууд нийлээд луйвардаж авсан агуулгатай зүйл ярьж, хөрөнгө оруулагчдын эрхийг хамгаалахаа амлаж байв. Гадаадын хөрөнгө оруулагчдын эрхийг хамгаалах нь зүй ёсны хэрэг мөн ч Б.Энхбаяр энэ удаа асуудлын нарийн шалтгааныг ХЗДХ-ийн сайдын байр сууриар хянаж, хуульд нийцүүлэх талаас харж, хянаж үзсэнгүй. Цэвэр өөрийн ашиг сонирхол, хувийн үзэмжээр шийдсэн Албан даалгавар гаргасан нь ил болоод буй.
Энэхүү албан даалгаварт Монгол Улсын Иргэний шүүх, Хонконг дахь Олон улсын арбитрын шүүх дээр өрнөж буй маргааныг үл тоомсорлосон, шууд Улсын бүртгэлийн Ү-2203024452 дугаартай 14 мянга гаруй м.кв талбай бүхий үйлчилгээний зориулалттай үл хөдлөх эд хөрөнгийн зохих хувийг “Хуашенконстракшн Монгол” ХХК-д өгөхийг үүрэгдсэн мөрүүд бий.
Маргалдагч талуудын өмчийг сэргээх шийдвэрийг хуулийн дагуу зөвхөн шүүх л гаргадаг. Гэвч Б.Энхбаяр ХЗДХ-ийн сайдын албан тушаалыг урвуулан ашиглаж, шүүхийн эрх мэдлийг булаан авч хэрэгжүүлсэн нь энэ асуудлын цаана авлига, албан тушаалын хэрэг нуугдсан гэж хардаж буйгаа сэтгүүлч Р.Саруултөгс ярьж байна.
Тиймээс өмчийн маргаан үүсгэж яваа хоёр талын нэгд нь илт үйлчилсэн ХЗДХ-ийн сайд асан Б.Энхбаярыг АТГ-т шалгуулахаар өгч байгаа аж. Мөн улс төрд нөлөө бүхий этгээд хоёр хуулийн этгээдийн хоорондын маргаанд шууд оролцож байгаа нь Монгол Улсын хууль тогтоомжийг зөрчсөн болохыг ч онцоллоо.
