Зургийн тайлбар: Бусдыг хууль бусаар саатуулсан, эрүүдэн шүүсэн хэрэгт яллагдагч, шүүгдэгчээр татагдаад буй Сүхбаатар дүүргийн цагдаагийн алба хаагч Э.Батзориг, Б.Балжинням, Ч.Ёолк, Б.Мөнх-Эрдэнэ, Ц.Доржнамжил нар
Уулын мод урттай богинотой шиг иргэнийг хууль бусаар баривчлаад зогсохгүй зодож, эрүүдэн шүүдэг цагдаа байдаг бололтой. Хамгийн ноцтой нь энэхүү гэмт хэргийг таван цагдаа бүлэглэн үйлдсэн гэх хэрэг шүүхэд шилжээд байна.
Тодруулбал, Сүхбаатар дүүргийн цагдаагийн газрын алба хаагчид болох Э.Батзориг, Б.Балжинням, Ч.Ёолк, Б.Мөнх-Эрдэнэ, Ц.Доржнамжил бусдыг хууль бусаар баривчилж, эрүүдэн шүүсэн гэх хэрэгт яллагдагчаар татагдан хэрэг нь шүүхэд шилжээд байгаа юм. Тэднийг Эрүүгийн хуулийн
- 21.12 дугаар зүйл.Эрүү шүүлт тулгах
Төрийн албан хаагч тайлбар, мэдүүлэг авах, хэрэг хүлээлгэх, ял, шийтгэл оногдуулах, ялгаварлах зорилгоор өөрөө, эсхүл бусад этгээдийг хатгаж, зөвшөөрөл олгож, эсхүл бусад байдлаар тухайн үйлдлийг хийхийг зөвшөөрч байгаагаа илэрхийлж бусдын бие махбод, сэтгэл санааг шаналган зовоосон бол таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар хорих ял шийтгэнэ.
- 13.9 дүгээр зүйл.Хууль бусаар баривчлах, саатуулах
Эрх бүхий албан тушаалтан хуульд заасан үндэслэл, журмыг зөрчиж хүний эрх чөлөөнд халдсан, баривчилсан, саатуулсан бол дөрвөн зуун тавин нэгжээс таван мянга дөрвөн зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас нэг жил хүртэл хугацаагаар зорчих эрхийг хязгаарлах ял шийтгэнэ. зүйл ангид зааснаар гэм буруутай эсэхийг дэнслэх бөгөөд бид энэ хэргийн талаар эргэж мэдээлэх болно.
