Үндэсний их баяр наадмыг зохион байгуулах комиссын дарга Н.Номтойбаяр наадмын нээлтийн тасалбарын хуваарилалтад өөрчлөлт оруулж буйгаа мэдэгдлээ.
Тэрбээр, өмнөх жилүүдэд наадмын нээлтийн нийт тасалбарын 40 орчим хувийг сайд, дарга нар болон тэдний гэр бүлийнхэн урилга нэрийдлээр үнэ төлбөргүй авдаг байсан талаар онцолсон юм. Харин энгийн иргэд тасалбараа өөрсдийн мөнгөөр худалдан авч, халуун наранд үздэг байсан нь шударга бус хандлага байсныг дурдав.
Иймээс энэ жилээс эхлэн наадмын нээлтийн нийт суудлын 100 хувийг худалдаалах шийдвэр гаргасан бөгөөд урилга нэрээр үнэ төлбөргүй суудал олгохгүй гэдгийг мэдэгдэв.
Мөн тэрээр, “Урилга өгсөнгүй гэж гомдож байгаа бол шүүх, цагдаагийн байгууллагад хандаж болно” хэмээн байр сууриа илэрхийлжээ.
