“Мандала тур” ХХК-аар дамжуулан 2026 оны 7-р сарын 16-нд Улаанбаатар–Жинин–Датун–Хөх хот–Улаанбаатар чиглэлийн аялалд гарсан нийт 44 аялагч одоогоор Датун хотод саатуулагдсан байна.
Аялагчдын мэдээлснээр, “Мандала тур” ХХК нь буудлын төлбөрөө бүрэн төлөөгүй гэх шалтгаанаар буудлын зүгээс аялагчдын гадаад паспортуудыг барьцаалан хадгалж, буцаан олгоогүй байгаа аж.
Тухайн аялалд оролцсон 44 хүн аяллын төлбөрөө компанидаа 100 хувь бүрэн төлсөн бөгөөд одоогийн нөхцөл байдлаар өөрсдийн буруугүй шалтгаанаар Датун хотод саатаж, хилээр гарах болон цааш зорчих боломжгүй болсон талаар мэдээлжээ.
Аялагчид компанийн зүгээс асуудлыг яаралтай шийдвэрлэж, буудлын төлбөрийг барагдуулан паспортуудыг буцаан олгож, аяллыг хэвийн үргэлжлүүлэх арга хэмжээ авахыг хүсэж байгаа юм.
Одоогоор уг асуудал бүрэн шийдэгдээгүй бөгөөд 44 аялагч Датун хотын буудалд паспорт нь барьцаанд байгаа нөхцөлд хүлээлтийн байдалтай байна.
Бид энэ талаар “Мандала тур” ХХК-аас тодруулахад “Одоогоор мэдээлэл өгөх боломжгүй байна” гэв
