Хошин урлагийн ТВ коктель хамтлагийн жүжигчин, “Яг түүн шиг” нэвтрүүлгийн хөтлөгч Э.Цолмонбаяр буюу Цоомоо сүүлийн хэдэн жил таг чиг. Мөрөөдлийн хуримаа хийсэн хэмээн бахархалтай ярьж суусан тэрээр өнгөрсөн гурван жилийн хугацаанд аав болжээ.
Гэр бүлсэг, эхнэрээ хайр халамжаар дутаах дургүй тэрээр урлагийн салбараас түр хөндийрч гэр бүлийнхээ бизнест ханцуй шамалж яваа аж.
Түүний эхнэрийг Өлзий гэдэг. Японд өндөр боловсрол эзэмшсэн даруухан бүсгүй.
Э.Цоомоо эхнэртэйгээ оюутан байхдаа танилцаж байжээ. Анх танилцсан дурсамжаа ярихдаа “Анх бид хоёр 2001 онд танилцаж байлаа. Би СУИС-ийн 2-р курсийн оюутан байсан үе. Жүжигчин Бархүү бид хоёр нэг анги. Хэлний сургуулийн оюутнуудын урлагийн үзлэгийг бэлдэж өгөөд нөгөө хэд маань түрүүлээд бөөн баяр.
Тэгээд хоёр ангиараа шифлээд найзууд болоод сайхан нөхөрлөсөн. Урлагийн сургуулийнхан чинь өглөөнөөс үдэш болтол сургууль дээрээ өнждөг, тухайн үедээ их ч өлсөнө. Тэр үед нөгөө шиф сургуулийнхан ирж бидэнд их ч пирошки авч өгсөн дөө. /инээв/
Нэг өдөр Бараа бид хоёрыг хамт төрсөн өдөрт явъя, та хоёр их хөгжилтэй юм чинь очоод гоё хөгжөөгөөд өгөөч, манай нэг найзын төрсөн өдөр гээд бид хоёр ч дуртайн аргагүй явлаа.
Тэгээд очтол төрсөн өдрийн эзэн ирээдүйн манай гэргий байсан юм. Анх хараад л дин дин дин гээд л /инээв/. Ёстой л нөгөө анхны харцаар дурлана гэдэг нь болсон доо. Тэр оройжин сэм сэм хараад л, хааяа харц мөргөлдөөд л. Тэгээд байнга бодоод уулзах шалтаг хайж яваад хоёулаа хааяа уулздаг, манай сургууль дээр ирдэг байснаа манай хүн гадагшаа яваад хэсэг холбоогүй болсон юм. Тэгээд нэг өдөр гэнэт санаандгүй таараад “хүүш чи сайн уу? би сайн…” болоод ахиад хоёулаа хааяа уулздаг болсон доо /тэр үед одоог бодвол их даруулгатай байсан болохоор кино үзэж хамт алхахаас хэтрээгүй/. Удалгүй би сургуулиа төгсөж хамтлагийн ажил, кино, нэвтрүүлэг гээд, манай хүн ч бас сургуулиа төгсөөд хэсэг завгүй холбоогүй болсон.
Учрах ёстой хүмүүс учирдаг гэдэг шиг бүр сүүлд 2012 онд facebook-ээс ахиж олж хараад “Сайн уу? чи мөн үү? Би Цоомоо байнаа” гээд л бичээд үлдээсэн нэг хоногийн дараа манай хүнээс хариу ирээд хоёулаа чатлаад, би ч эрэгтэй хүний эхний асуулт “Хүнтэй суусан уу?” гээд л асуусан манай хүн үгүй ээ, харин чи суусан уу? гээд тэгээд л бөөн баяр хоёулаа чатлаад эргээд холбоотой болсон. Тэр жилийн өвлийн амралтаар ирэхэд нь уулзаад, дараа жилийн цагаан сараар бэр гуйгаад л эхэлж байлаа. Анхны харцаар учирсан тэр учралаас хойш зөндөө олон салж нийлсэн ч гэсэн учрах ёстой хүмүүс байсан болоод бид хоёр нийлсэн дээ” хэмээн ярьжээ.
