Хөл хорионы энэ өдрүүдийг хүн бүр өөр өөрийнхөөрөө өнгөрүүлж байна. Ихэнх хүмүүс уйдаснаа гайхан сошиалд бичиж буй бол зарим нь боломж болгон ашиглаж өөрийгөө хөгжүүлж, бие галбиртаа анхаарч эхэлжээ.
Тэдний нэг бол UB Comedy клубын гишүүн, комедиан У.Содхүү буюу Содоо. Сонирхолынхоо дагуу сагсан бөмбөг тайлбарладаг тэрээр жингээ нэлээд эрчимтэй хасч эхэлсэн байна. Өдгөө 24 настай тэрээр хэдийнэ гэрлэж, 2 хүүхдийн аав болсон гэдэг.
Багын унаган махтай тэрээр ээжээсээ 5,8кг жинтэй төрж байжээ. Өөрийнхөө болон аавынхаа тухай нэгэн хэвлэл ярихдаа “Би дээрээ гурван эгчтэй, айлын бага. Аав Сүхбаатар аймгийн Алтан-Овоонд очиж, “надад хүү хайрлаач” гэж гуйсан юм билээ. Тэгээд аав минь 5.8 кг хүүтэй болсон нь би. Сургуулийн өмнөх боловсролыг гэртээ эзэмшсэн. Гурван тамир сургуулийг 2011 онд төгссөн.Манай аав хөдөлмөрийн баатар, ардын зураач, төрийн шагналт Н.Цүлтэмийн шавь зураач Д.Уртнасан гэж хүн бий. Монголын эртнээс уламжлагдаж ирсэн нахтан зургийн төрлөөр бүтээлээ туурвидаг. Би ааваасаа хөгжмийн нарийн мэдрэмж өвлөсөн. Аав маань багадаа одоогийн Хөгжим бүжгийн консерваторын хийл хөгжмийн ангид сурч байсан юм билээ. Тэгээд нэг удаа уран зургийн ангийн хажуугаар өнгөрөөд зургийн анги руу урвасан гэсэн. Аав багаас минь “Битлз” хамтлагийн гоцлол гитарчин Жорж Харрисоны дууг сонсгодог байсан. Нэг хөгжилтэй зүйл хэлэхэд намайг нэгдүгээр ангид байхад англи хэл дээрх дууны тэмцээн болоод би Жорж Харрисоны дуугаар ороод байр эзлээгүй.
Тэгсэн түрүүлсэн хүүхэд нь “Ten little Indians” гээд хүүхдийн дуу дуулсан. Ер нь надаас бусад хүүхэд тэр тэмцээнд багшийн зааж өгсөн хүүхдийн дуу дуулсан. Ингээд яривал бага байхад тохиолдсон хөгжилтэй зүйл олон бий” гэжээ.
