Өнгөрсөн жилийн өдийд “Гоёл”-ын тайзнаа өөрийн “Monroze” брэндээ танилцуулж явсан загвар өмсөгч С.Сарнай өдгөө гэрээсээ ажиллаж байна. Брэнд бүтээгдхүүнээ сошиал марктингээр борлуулж буй тэрээр хувцасныхаа эсгүүрийг өөрөө хийдэг аж.
Тэрээр өнгөрсөн жил “Шилдэг залуу дизайнер”-ын шагналыг Гоёл наадмаас хүртсэн. Энэ тухайгаа “Анх удаа өөрийн гаргасан загвараар “Гоёл” наадамд орж, өөрийнхөө загварыг тайзан дээр амьлуулах мөрөөдөл маань биеллээ” гэж байв.
Олноо “Яг түүн шиг” шоуны оролцогч гэдгээрээ танигдсан загвар өмсөгч С.Сарнай загварын салбарт моделиор чамгүй олон жил ажилласан. Тэрээр 12 жил Япон улсад сурч, ажиллаж байгаад Монголдоо 2011 онд ирсэн. Монголдоо ирээд, хүсэл мөрөөдлийнхөө дагуу “Сити” дээд сургуулийг хувцас дизайнер мэргэжлээр суралцаж, 2015 онд их сургуулиа төгссөн байна.
Үүний дараагаар өөрийн “Monroze” брэндийг үүсгэн байгуулж, үндэсний хэв маягийг орчин үеийн стиль имижид шингээсэн өвөрмөц загваруудыг урлах болсон билээ.
“Яг түүн шиг” шоунд оролцохоос өмнө түүнийг 2014 оны “Азийн Стар модель”, дуучин Д.Болдын “Үүлэн домог”, дуучин М.Мягмартай хамтран дуулсан “Байна уу, ээж ээ?” дуугаар нь хүмүүс сайн мэднэ.
